Qytaı men ShYU elderiniń saýda aınalymy 7 aıda 1.8 paıyzǵa ósti

ASTANA. KAZINFORM — Bıylǵy qańtar-shilde aralyǵynda Qytaıdyń Shanhaı yntymaqtastyq uıymyna (ShYU) múshe eldermen taýar aınalymy 293,1 mlrd AQSh dollaryna jetip, ótken jyldyń sáıkes kezeńimen salystyrǵanda 1,8 paıyzǵa artqan. Bul týraly Qytaı Úkimetiniń resmı saıty habarlady. 

Resmı derekterge sáıkes, sońǵy bes jylda Qytaı men ShYU elderi arasyndaǵy saýda kólemi turaqty túrde ósip keledi. Taraptar arasyndaǵy taýar aınalymy 2024 jyly 512.4 mlrd dollarǵa jetip, aldyńǵy jylmen salystyrǵanda 2,7 paıyzǵa artty.

Saıttyń jazýynsha, ásirese ekonomıkanyń jańa formaty men jańa salalarynda aıtarlyqtaı serpin baıqalady. Máselen, 2024 jyly Qytaıdyń ShYU elderinen elektrondyq saýda arqyly ımport kólemi sáıkes mezgildegiden 34 paıyzǵa artqan.

Sonymen qatar ınvestıtsııa jáne ekonomıkalyq-tehnıkalyq yntymaqtastyq salasynda da turaqty ósim bar. Shilde aıynyń sońyna deıin Qytaıdyń ShYU elderine salǵan tikeleı ınvestıtsııasynyń jalpy qory 40 mlrd dollardan asty. Buǵan deıin negizinen energetıka, paıdaly qazbalar, ınfraqurylym salalaryna baǵyttalǵan ınvestıtsııalar qazirgi kúnde tsıfrlyq ekonomıka men jasyl damý sııaqty jańa salalarǵa oıysyp keledi.

Aıta keteıik, ShYU 2001 jyly 15 maýsymda qurylǵan. Uıymnyń basty maqsaty — múshe memleketter arasyndaǵy senim men tatý kórshilikti nyǵaıtý, saıasat, ekonomıka, mádenıet, bilim jáne ǵylym-tehnıka salalaryndaǵy ózara tıimdi yntymaqtastyqty damytý, aımaqtaǵy beıbitshilikti, qaýipsizdikti jáne turaqtylyqty qamtamasyz etý, ádil, demokratııalyq jáne utymdy jańa halyqaralyq tártip ornatýǵa atsalysý.

Qazirgi tańda uıymǵa 10 memleket múshe: Úndistan, Iran, Qazaqstan, Qytaı, Qyrǵyzstan, Pákistan, Reseı, Tájikstan, Ózbekstan jáne Belarýs.

Eske sala keteıik, ShYU sammıti 31 tamyz ben 1 qyrkúıek aralyǵynda Qytaıdyń Tıantszın qalasynda ótedi. Onda ShYU-nyń 2035 jylǵa deıingi damý strategııasy qabyldanady.