Qytaı men Ortalyq Azııa elderi qandaı telejobalar ázirledi
ASTANA. KAZINFORM – Qazaqstan Ortalyq Azııa elderi men Qytaıdy birlesken medıaóndiristi keńeıtýge, oqytý baǵdarlamalaryn júrgizýge, halyqaralyq strımıng platformalary men ulttyq kontentti ilgeriletýge shaqyrdy.
QR Mádenıet jáne aqparat vıtse-mınıstri Qanat Ysqaqovtyń aıtýynsha, QHR tóraǵasy Sı Tszınpınniń ótken jylǵy Qazaqstanǵa sapary aıasynda birqatar kelisimge qol qoıyldy. Onyń ishinde QHR Radıo jáne teledıdar bas basqarmasymen, Qytaıdyń CMG medıakorporatsııasymen sondaı-aq Sınhýa aqparattyq agenttigimen yntymaqtastyq týraly memorandýmdarǵa qol qoıylǵan.
− Osy qujattar birqatar naqty baǵdarlamalardy iske asyrýǵa negiz boldy. Olardyń qatarynda elderdiń týrıstik áleýeti týraly birlesken derekti fılm túsirý, «Bir beldeý – Bir jol» bastamasynyń 10 jyldyǵyna arnalǵan telejoba, sondaı-aq Big Data, JI jáne medıatehnologııalar baǵytynda jýrnalısterdiń biliktigin arttyrý bastmalary bar, − dedi Q. Ysqaqov «Qytaı – Ortalyq Azııa» aqparat agenttikteri forýmynda.
Ekijaqty ózara is-qımyldy nyǵaıtý aıasynda Qazaqstan «Ortalyq Azııaǵa arnalǵan biryńǵaı aqparattyq keńistik» ıdeıasyn ilgeriletip keledi. Prezıdent Qasym-Jomart Toqaev Ortalyq Azııanyń baı tarıhı-mádenı jáne gýmanıtarlyq murasyn ashatyn ortaq óńirlik telearna, birlesken telejobalar men tanymdyq baǵdarlamalar qurý máselesin birneshe ret kóterdi. Bul baǵytta Qzaqstan, Ózbekstan jáne Qyrǵyzstan «Qorqyt ata» telehıkaıasyn, Zakaýat ıntellektýaldyq shoýyn, «Qos qanat» telekópiri sııaqty jobalardy júzege asyrdy.
− Bizdiń elder arasynda sońǵy jyldary medıa salasyndaǵy dıalogtyń aıtarlyqtaı nyǵaıýy mańyzdy jetistik boldy. Astanada ótken І Ortalyq Azııa medıaforýmy biregeı alańǵa aınaldy. Sonymen birge, biz kórshiles elderde qazaqstandyq telearnalardyń parıtetti habar taratýyn keńeıtý boıynsha belsendi jumys júrgizýdemiz jáne qytaılyq áriptesterdi osyndaı formatqa qatysýǵa shaqyramyz. Jalpy Qazaqstan Ortalyq Azııa elderimen birlesip, memorandýmǵa jáne basqa da strategııalyq qujattarǵa qol qoıdy. Bul bizdiń elder arasynda tatý kórshilik áriptestikti kórsetedi, − dedi vıtse-mınıstr.
Úshinshi óte mańyzdy baǵyt – jalǵan aqparatqa, JI men túrli neırobaǵdarlamalarǵa baılanysty jahandyq qıyndyqtarǵa tap bolýymyz. Qazaqstan bul qubylysty qarsy turýdyń júıeli tájirıbesin jınaqtaǵan jáne óz tájirıbesin bólisýge daıyn.
− Qazaqstan kreatıvti ındýstrııany belsendi damytyp keledi. Jas jobalardy qoldaýǵa salyq jeńildikteri beriledi. Shyǵarmashylyq habtar quryp, medıa salasyn granttyq qoldaý mehanızmin engizýde. Biz úshin kreatıvtik sektor – eń joǵary qýaty bar jáne ınvestıtsııalyq áleýeti bar sala. Sondyqtan osyǵan baılanysty biz mádenı týrızmdi, jasyl ekonomıkany, ınnovatsııalyq ındýstrııany damytýǵa úlken jol ashyp jatyrmyz. Báz áriptesterimizdi osyndaı biryńǵaı jáne ortaq jobalardy qurýǵa shaqyramyz, − dedi Q. Ysqaqov.
Aıta keteıik, Prezıdent Ortalyq Azııa – Qytaı aqparat quraldarynyń forýmyna quttyqtaý joldady.
QR Prezıdenti teleradıokesheni men «Sınhýa» aqparat agenttigi arasynda yntymaqtastyq týraly Memorandýmǵa qol qoıyldy. Qujatta jańalyq kontentimen almasý, birlesken trenıngter men semınarlar ótkizý, mýltımedıalyq ózara is-qımyldyń jańa formattaryn damytý, sondaı-aq aqparatty ulttyq jáne halyqaralyq deńgeıde ilgeriletý kózdelgen.