Qytaı Qazaqstan unyn kóptep satyp ala bastady
ASTANA. KAZINFORM – 2024-2025 marketıng jylynda 10 mıllıon 300 myń tonna astyq eksportqa shyǵaryldy. Bul týraly Úkimet otyrysynda Kólik mınıstri Nurlan Saýranbaev aıtty.
- Agroónerkásip kesheniniń basty maqsaty – ónimdi ýaqytyly satyp, qoımalardy jańa astyqqa bosatý. 2024-2025 marketıng jylynda 13 mıllıon 300 myń tonna astyq tasymaldanyp, 45 paıyzǵa ósti. Onyń ishinde 10 mıllıon 300 myń tonna eksportqa jáne 3 mıllıon tonna respýblıka boıynsha jetkizildi. Negizgi baǵyttarda oń dınamıka baıqalady. Bólek aıtqanda, Qytaı baǵytynda astyqtyń kólemi tómendegenmen azyqtyq un 2 mıllıon tonnaǵa jetip, 4,6 esege ósti. Bul, óńdeýshilerdiń qosylǵan quny joǵary ónimdi shyǵarýdyń arqasynda múmkin boldy, - dedi Nurlan Saýranbaev.
Bıyl boljam boıynsha 24 mln tonna astyq bastyrylady.
Osy rette Premer-mınıstr astyqty egis alqabynan tıisti jerine deıin jetkizýdi joǵary deńgeıde uıymdastyrýdy tapsyrdy.
