Qytaı elimizdegi sý tasqynymen kúreske kómekti jalǵastyrady

ASTANA. KAZINFORM – Qytaı Qazaqstanda bolǵan sý tasqynynan keıin qaıta qalpyna keltirý jumystaryna qol ushyn sozýdy jalǵastyrady. Bul týraly Qytaı Halyq Respýblıkasynyń Syrtqy ister mınıstri Van I málim etti.

«Bıyl Qazaqstan iri sý tasqynyna tap boldy. Baýyrlas kórshi jáne strategııalyq seriktes retinde Qytaı shyn júrekten janashyrlyq tanytady, biz qalpyna keltirý jumystarynda qoldan kelgenshe kómek pen qoldaý kórsetýdi jalǵastyrýǵa daıynbyz», - dedi Van I búgin Qazaqstanǵa sapary barysynda.

Odan ári Qytaı mınıstri eki el arasyndaǵy saýda-sattyqtyń arta túsetinin aıtty.

«Bizdiń statıstıka boıynsha 2023 jyly eki el arasyndaǵy taýar aınalymy 41 mlrd dollardy qurady. Eki el 40 mlrd dollar taýar aınalymyna qol jetkizý boıynsha memleket basshylary qoıǵan josparǵa merziminen buryn qol jetkizdi», - dedi Van I.

Buǵan deıin Qytaı Syrtqy ister mınıstri Iran Prezıdentiniń ólimine qatysty pikir bildirgen edi.