Qytaı álemdegi eń uzaq áýe reısin iske qospaq
ASTANA. KAZINFORM — Jeltoqsanda China Eastern Air Holding áýe kompanııasy álemdegi eń uzaq áýe reısin iske qosady. Jańa baǵyt Shanhaıdan Býenos-Aıreske deıingi reısti qamtıdy, dep habarlaıdy Kazinform.
Zhongguo Wang basylymynyń jazýynsha, shamamen 20 myń shaqyrymǵa sozylatyn bul áýe qatynasy eki megapolıstiń arasyndaǵy jol ýaqytyn 25 saǵatqa deıin qysqartpaq.
Uzaq qashyqtyq pen ushaqtardyń tehnıkalyq múmkindikterine baılanysty reıs barysynda Jańa Zelandııada aralyq qoný josparlanǵan.
Dástúrli baǵyttar Eýropa nemese Soltústik Amerıka arqyly birneshe aýysymdy qajet etse, jańa reıs jalpy ýaqytty 30 saǵattan 25 saǵatqa deıin azaıtady.
Sarapshylardyń aıtýynsha, Ońtústik Amerıkanyń iri astanalaryn Beıjiń jáne Shanhaımen tikeleı baılanystyratyn turaqty áýe qatynastary Qytaıdyń halyqaralyq áýe jelisin osy eń alys naryqqa deıin keńeıtýge jol ashady.
Qazirgi ýaqytta eń uzaq «tikeleı» reıs rekordy Air China kompanııasyna tıesili. Ol Pekın men San-Paýlý arasyndaǵy baǵytty Madrıd arqyly júzege asyrady.
Buǵan deıin Gonkongtan Qazaqstanǵa tikeleı reıster ashý josparlanyp otyrǵany habarlanǵan edi.