Qysqy Olımpıada oıyndarynyń úshinshi kúni nesimen este qaldy
MILAN. KAZINFORM — Italııanyń Mılan jáne Kortına-d’Ampetstso qalalarynda ótip jatqan XXV qysqy Olımpıada oıyndarynyń úshinshi jarys kúnin óz máresine jetti.
Bul kúni sloýpstaıl (áıelder), komandalyq taý shańǵy jarysy (erler), konkımen júgirý (áıelder 1000 metr) jáne Bıg-eır (áıelder) sııaqty sport túrleriniń medalderi sarapqa salynyp, júlde jeńip alǵan elder sany 18-ge jetti.
Kúnniń basty ýaqıǵalary retinde sloýpstaıl jáne konkımen júgirý jarysy boldy.
Áıelder arasynda ótken sloýpstaıl synynda basty favorıt sanalǵan qytaılyq Eılın Fen Gý óte az upaı aıyrmashylyǵymen Shveıtsarııa quramasynyń sportshysy Matılda Gremoǵa jol berdi.
Al áıelder arasyndaǵy 1000 metrge konkımen júgirý jarysy Nıderland sportshylarynyń jeke sahnasyna aınaldy.
Birinshi bolyp jarys jolyna shyqqan Sıýzanne Shıýltıng márege jetýge 1 mınýt 15.46 sekýnd ýaqyt jumsap, kósh bastap turdy. Alaıda AQSh jáne Kanada, Japonııa men Koreıa sportshylary arasyndaǵy básekelestik jarysty qyzdyra tústi.
Sońǵy jupta óner kórsetken nıderlandylyqtar qos Olımpıada rekordyn tirkedi. Eń áýeli Femke Kok 1 mınýt 12.59 sekýnd nátıjemen máre syzyǵyn kesti. Alaıda kelesi kezekte jarys jolyna shyqqan onyń otandasy ıÝtta Lerdam 1 mınýt 12.31 sekýnd kórsetip onyń rekortyn jańalap ketti. Japonııalyq sportshy Mıho Takagı qola medal enshiledi.
Norvegııa quramasy 3 altyn, 1 kúmis jáne 2 qola medalmen áli kósh bastap tur. Al taý shańǵysy jáne sloýpstaıl jarysynan 2 altyn jeńip alǵan Shveıtsarııa quramasy jalpy esepte ekinshi orynǵa kóterildi.
Snoýbord sportynan bıg-eır jarysynda Kokomo Mýrase Japonııa quramasyna ekinshi altyn medal syılady. Osynyń arqasynda Japon quramasy úzdik úshtikten kórindi.
Osyǵan deıin habarlaǵanymyzdaı, áıelder arasynda 1 000 metrge júgirý synynda el namysyn Nadejda Morozova, Elızaveta Golýbeva jáne Krıstına Sılaeva qorǵady.