Qyrkúıekte Ertis ózeni taǵy tasýy múmkin

PAVLODAR. KAZINFORM — Buǵan Shyǵys Qazaqstandaǵy sý qoımalarynyń sý bosatý kólemin 50%-ǵa arttyrýy sebep bolýy múmkin. Kúzde ózenge sekýndyna 1500 tekshe metr sý jiberiledi degen boljam bar.

Bul týraly Pavlodar oblysynyń jer qoınaýyn paıdalaný, qorshaǵan orta jáne sý resýrstary basqarmasy basshysynyń orynbasary Dııar Qaıyrkenov Kazinform tilshisine habarlady.

— Qazirgi ýaqytta Shyǵys Qazaqstandaǵy qoımalardan ózenge sekýndyna 1000 tekshe metr sý jiberilip otyr. Ertis basseındik ınspektsııasynyń málimetine súıensek, qyrkúıek aıynda bul kólem 1500 tekshe metrge ulǵaıýy múmkin. Osyǵan baılanysty mal azyǵyn daıyndap jatqan sharýashylyqtar shabylǵan shópterin bıikteý jerlerge tasyp alýy kerek dep oılaımyz. Bizdiń esebimiz boljam ǵana, jaǵdaı biz aıtqandaı bolmaýy da múmkin. Sýdyń bosatylý kólemi ózgerissiz qalýy da ǵajap emes. Saqtyqta qorlyq joq ekenin eskergen abzal. Erteń Ertistiń tómengi bóliginde ornalasqan jaıylmalarǵa sý jaıylatyn bolsa, sharýalardyń jaz boıǵy eńbegi dalaǵa ketetini anyq. Al qoımalardyń bul áreketi jınalǵan sýdyń kóptigine baılanysty eriksizden jasalyp otyr, -dep jaýap berdi Dııar Qaıyrkenov.

Basqarma ókili aıtqandaı, bıyl kóktemde sý tasyǵanda Ertis jaıylmalarynyń 80%-dan astamyna sý jaıyldy.

Al qyrkúıek aıynda ózen taǵy kóteriletin bolsa, Aqtoǵaı, Ertis, Pavlodar aýdandarynyń jaıylmalaryna qaıtadan sý kirýi múmkin.

Eske sala keteıik, bıyl kóktemde ózen jaıylmasynyń 85 paıyzyn sý basady degen boljam aıtylǵan.