Qyrǵyzstanda ortaazııalyq ózen kámshaty tabyldy

ASTANA. KAZINFORM – Qyrǵyzstan aýmaǵynda sońǵy on jylda alǵash ret ortaazııalyq ózen kámshaty anyqtaldy, dep habarlaıdy Kazinform menshikti tilshisi.

Qyrǵyzstannyń Tabıǵı resýrstar, ekologııa jáne tehnıkalyq qadaǵalaý mınıstrliginiń málimetinshe, Qazaqstanmen shekaralas aýmaqta aǵyp ótetin Turyq ózeninde, «Han-Táńiri» memlekettik tabıǵı parkiniń aýmaǵynda ortaazııalyq ózen kámshatynyń eresek darasy beınejazbaǵa túsirilgen. Bul – sońǵy on jyldaǵy alǵashqy tirkelgen derek.

– 2023-2025 jyldary Qyzyl-Sýý, Chatqal, Túp, Kókómeren jáne Shý ózenderinde júrgizilgen zertteýler barysynda kámshattyń tirshilik belgileri anyqtalmaǵan. Bul jaǵdaı Qyrǵyzstan aýmaǵynda atalǵan túrdiń joıylyp ketýi múmkin degen alańdaýshylyq týǵyzǵan. Alaıda jańa beınejazba kámshattyń Qazaqstan aýmaǵynan ótip kelýi múmkin degen boljamdy rastap otyr, – delingen mınıstrlik habarlamasynda.

Vedomstvo Turyq ózeniniń arnasynda qosymsha zertteýler júrgizý qajettigin atap ótti. Bul kezdesken kámshattyń jeke mıgratsııalyq dara ekenin nemese óńirde turaqty popýlıatsııa saqtalǵanyn anyqtaýǵa múmkindik beredi.

Buǵan deıin qar barysy resmı túrde Qyrǵyzstannyń sımvoly bolyp tanylǵany habarlanǵan bolatyn.