Qyrǵyzstanda mektep formasyna qatysty sheshim qabyldandy
ASTANA. KAZINFORM — Qyrǵyzstanda mektep formasyna qoıylatyn qoldanystaǵy biryńǵaı talaptardy ózgerissiz qaldyrý týraly sheshim qabyldandy. Bul týraly eldiń Oqý-aǵartý mınıstrligi habarlady, dep jazady Kabar.
Mınıstrliktiń 2026 jylǵy 23 sáýirdegi № 545/1 buıryǵymen mektep formasyna qatysty usynystardy qaraý úshin arnaıy jumys toby qurylǵan. Jumys toby muǵalimder, ata-analar, oqýshylar men sarapshylardyń pikirlerin eskere otyryp, 2015 jylǵy 12 tamyzdaǵy № 572 qaýlymen bekitilgen «Qyrǵyz Respýblıkasynyń jalpy bilim berý uıymdarynda mektep formasyna biryńǵaı talaptardy engizý týraly» qujatty ózgerissiz qaldyrý jóninde sheshim qabyldady.
Kóp jaǵdaıda ata-analar balalarǵa «ústi ashyq tústi, asty qoıý tústi» qaǵıdasyna saı mektep formasyn ózderi tańdaıdy. Bul tájirıbe keń taralǵan ári oqý protsesinde qıyndyqtar men kelispeýshilikter týyndatpaıdy.
Qyzdarǵa arnalǵan mektep formasy klassıkalyq stıldegi blýzka, jılet, beldemshe, shalbar, kóılek, aljapqysh jáne pıdjaktan turady. Kıimder bir tústi nemese tor kóz matadan (qara, sur, kók, bordo) tigiledi. Beldemsheniń uzyndyǵy tizeden keminde 5 sm tómen, eń uzyn nusqasy baltyr ortasyna deıin bolýy tıis. Ruqsat etiletin jeıde tústeri: aq, ashyq sur, ashyq kók. Kıim jıyntyǵynda úsh tústen artyq qoldanýǵa bolmaıdy.
Uldarǵa arnalǵan mektep formasy jeıde, jılet, shalbar jáne pıdjaktan turady. Barlyǵy klassıkalyq stılde, qara, sur, kók nemese bordo tústerinde tigiledi. Shalbar tik pishindi bolýy tıis, aıaq jaǵyna qaraı azdap taryltýǵa ruqsat etiledi. Jeıde tústeri qyzdarǵa qoıylatyn talaptarmen birdeı. Jalpy kıim jıyntyǵynda úsh tústen artyq qoldanýǵa bolmaıdy.
Mınıstrlik ókilderiniń aıtýynsha, biryńǵaı ári ustamdy mektep formasy balalar arasyndaǵy áleýmettik aıyrmashylyqtardy azaıtyp, kıimge baılanysty básekelestiktiń jáne materıaldyq jaǵdaıǵa qatysty qysymnyń aldyn alýǵa yqpal etedi.
Budan buryn Qyrǵyzstanda bilim berý salasy qyzmetkerlerin marapattaý júıesi jańartylǵanyn jazdyq.
