Qyrǵyzstanda Ystyqkóldegi sý deńgeıiniń tómendeý máselesi talqylandy

ASTANA. KAZINFORM — Qyrǵyzstan Prezıdenti Sadyr Japarov Bishkekte ótken IV Halyq quryltaıynda sóılegen sózinde sý resýrstaryna qysymdy kúsheıtip otyrǵan jahandyq klımattyń ózgerýi máselesin qozǵady, dep habarlaıdy Kazinform menshikti tilshisi.

Sadyr Japarovtyń aıtýynsha, 1854 jyldan beri Ystyqkóldegi sý deńgeıi shamamen 14 metrge tómendegen, al kólge quıatyn ózenderdiń sany aıtarlyqtaı qysqarǵan. Bul jaǵdaı alańdaýshylyq týǵyzady.

— 1950–1960 jyldary kólge shamamen 100–110 ózen quıatyn, qazir olardyń sany nebári 30–35-ke jetedi. Eger bul úrdis jalǵasa berse, óńir ekologııalyq ári áleýmettik-ekonomıkalyq turǵydan eleýli saldarǵa tap bolýy múmkin, — dedi ol.

Prezıdenttiń aıtýynsha, Úkimet kólge keletin sý kólemin arttyrý, jańa kanaldar men gıdrotehnıkalyq nysandar salý jobalaryn iske asyrý arqyly qajetti sharalardy qabyldap jatyr.

Eske sala keteıik, 25–26 jeltoqsanda Bishkekte IV Halyq quryltaıy ótip jatyr. Oǵan memleket basshysy, mınıstrler kabınetiniń músheleri, parlament depýtattary, memlekettik organdar men jergilikti ózin-ózi basqarý ókilderi, sondaı-aq eldiń barlyq óńirinen kelgen 690 delegat qatysyp jatyr.

Buǵan deıin biz Aral teńiziniń tartylýy Qyrǵyzstan muzdyqtaryna qalaı áser etetini týraly jazǵan edik.