Qyrǵyzstanda eki aı ishinde qyzylsha aýrýynan 8 bala kóz jumdy

ASTANA. KAZINFORM — Qyrǵyzstanda qyzylshanyń taralýynan 8 bala kóz jumdy. Bul týraly Qyrǵyz Respýblıkasynyń Mınıstrler kabıneti tóraǵasynyń orynbasary Edıl Baısalov málimdedi, dep habarlaıdy Kazinform agenttiginiń menshikti tilshisi.

Sheneýniktiń aıtýynsha, eldegi qyzylsha aýrýynyń jaǵdaıy óte qaýipti bolyp tur. Jyl basynan beri 3 739 qyzylsha juqtyrý oqıǵasy tirkelip, bul aýrýdan segiz bala kóz jumǵan.

— Búkil óńirde qyzylshanyń iri órshýi baıqalady. Elde óte qaýipti jaǵdaı qalyptasyp otyr. Ótken jyly alty ólim jaǵdaıy tirkelse, bıyl tek qańtar-aqpan aılarynda ǵana bul aýrý segiz balanyń ómirin qıdy. Bul jol berýge bolmaıtyn jaǵdaı. Ár aýdan basshysy dabyl qaǵyp, jaǵdaıdy jeke baqylaýyna alýy kerek. Biz ekpe salýdy jappaı qamtý sharalaryn kúsheıtýge mindettimiz. Bul – bizdiń balalarymyzdyń ómiri men densaýlyǵy, — dep atap ótti Edıl Baısalov.

Densaýlyq saqtaý mınıstrligine aýrýdyń órshýin oqshaýlaý boıynsha shuǵyl sharalardyń keshendi josparyn ázirleý, jaǵdaıdy qatań baqylaý jáne óńirlerde jedel áreket etý úshin vaktsına qoryn jetkilikti mólsherde qamtamasyz etý tapsyryldy.

Aıta ketelik Qyrǵyzstanda qyzylsha aýrýyna shaldyqqandar sany artqany týraly jazǵan edik.