Qyrǵyzstanda alǵash ret halyqaralyq Gallops at jarysy ótedi

ASTANA. KAZINFORM — 19–27 shilde aralyǵynda Qyrǵyzstanda alǵash ret halyqaralyq Gallops jobasy — álemge áıgili ekspedıtsııalyq at jarysy ótedi, dep habarlaıdy Kabar.

Shara Sońkól atty kórkem bıik taýly kól aýmaǵynda uıymdastyrylady, dep habarlady MEK janyndaǵy Týrızm departamentiniń dırektory Erdenet Kasymov.

Onyń aıtýynsha, Qyrǵyzstan týrızm salasyn belsendi damytyp, halyqaralyq jobalardy elge tartýǵa kúsh salyp keledi.

— Prezıdent Sadyr Japarov taýly óńirlerdi damytýdyń bes jyldyǵyn jarııalady, al Gallops jobasy osy bastamalarmen tolyq sáıkes keledi. Jarys marshrýtynyń bastalýy men aıaqtalýy Jýmǵal aýdanynyń Kyzart aýylynda ótedi. Bul aýyl etnotýrızmdi damytyp, qonaqtardy qabyldaýǵa tolyq daıyn, — dedi Kasymov.

Ol sondaı-aq elde ınfraqurylymdyq reformalar júrgizilip jatqanyn, birneshe qalada jańa ıppodromdar salynyp jatqanyn aıtty.

Gallops jobasynyń negizin qalaýshy jáne jetekshisi Badı Kebır biregeı mádenıeti men tabıǵatynyń arqasynda tańdaý Qyrǵyzstanǵa túskenin atap ótti.

— Gallops jobasynyń basty maqsaty — mádenıetti damytý, óńirdi tanymal etý jáne álemniń túkpir-túkpirinen at sportyna qyzyǵýshylyǵy bar adamdardy biriktirý. Qatysýshylar — negizinen tabysy joǵary týrıster. Bul Qyrǵyzstan ekonomıkasyna oń áser etedi, óıtkeni olardyń kóbisi keıin elge qaıta oralady, — dedi ol.

Gallops — bul «Parıj–Dakar» úlgisindegi erekshe at marafony. Bul — komandalyq navıgatsııa men tózimdilik jarysy. Bes kúnde qatysýshylar 200 shaqyrymdaı qashyqtyqty eńseredi, shabandozdyq sheberligin, rýhanı kúshin jáne komandalyq birligin synaıdy.

Kún saıyn shabandozdar shamamen 40 shaqyrym jol júredi. Ár kezeńnen keıin veterınar attyń pýlsin tekseredi — ol 70 soqqydan aspaýy tıis. Eger joǵary bolsa, bul — shamadan tys júkteme bolyp esepteledi. Sondyqtan baqylaý óte qatań bolady.

Jarysqa ártúrli elderden 12 komanda jáne bir qyrǵyz komandasy qatysady. Gallops jarysyn Qyrǵyzstanda ótkizýge jobanyń jergilikti úılestirýshisi Azamat Jamankýlovtyń qoldaý kórsetýi sebep boldy.

— Gallops jobasy buǵan deıin Oman, Marokko, Iordanııa jáne Úndistanda ótken. Bıyl alǵash ret Qyrǵyzstanda uıymdastyrylyp otyr. 19 shildede shabandozdar Jýmǵal aýdanyndaǵy Kyzart aýylynan bastap, Sońkól kólin aınalyp, qaıta sol aýylǵa oralady, — dedi Jamankýlov.

Keshkisin qatysýshylar úshin mádenı sharalar, kóshpendiler oıyndary, qolóner sheberleriniń sheberlik saǵattary, «Manas» eposymen, Shyńǵys Aıtmatovtyń shyǵarmashylyǵymen jáne Salbýýrýn ańshylyq ónerimen tanystyrý ótkiziledi.

Uıymdastyrýshylar atap ótkendeı, qatysýshylar men qonaqtardy keremet tabıǵat, kóshpeli mádenıet jáne halyqaralyq atmosfera kútedi.

Alaıda Gallops — tek jarys emes. Munda jyldamdyqtan góri dostyq, shytyrman oqıǵa jáne tabıǵatpen úndestik basty qundylyq bolyp esepteledi.

Buǵan deıin qazaqstandyq jas tennısshiler Qyrǵyzstandaǵy týrnırde úzdik shyqqanyn jazǵanbyz.