Qyrǵyzstan týyna ózgeris engizedi
Jogorký Kenesh tóraǵasy Nýrlanbek Shakıev memlekettik tý avtorlary Jýsýp Mataev pen Bekbosýn Jaıchybekovpen, sonymen qatar memleket jáne qoǵam qaıratkeri Medetkan Sherımkýlovpen kezdesip, memlekettiń negizgi sımvolyn ózgertýge qatysty usynystaryn tyńdady, dep habarlady parlamenttiń baspasóz qyzmeti. Kazinform bul týraly Kabar agenttigine silteme jasap jazdy.
Baspasóz qyzmetiniń aqparaty boıynsha, Nýrlanbek Shakıev memlekettik týǵa qatysty túrli pikir bar ekenin atap ótken. Sonymen qatar ol alýan kózqarasty eskere otyryp depýtat Ýlan Prımovpen birlesip týdyń keı elementterin naqtylaý týraly zań jobasyn daıyndaıtynyn atap ótti.
«Ulttyq tý – negizgi sımvoldarymyzdyń biri. Ony Qyrǵyzstan atynan bedeldi halyqaralyq jarystarǵa shyǵyp, el namysyn qorǵaıtyn sportshylarymyz, daryndy otandastarymyz kóteredi. Sol sebepti biz oǵan uqypty qarap, talqylaýǵa jol bermeýimiz kerek», - dep tolyqtyrdy tóraǵa.
Ol memlekettik tý avtorlary men qoǵam pikiri tý elementterin bekitýde mańyzdy rólge ıe ekenin atap ótti.
Medetkan Sherımkýlov, Bekbosýn Jaıchybekov jáne Jýsýp Mataev 10 kún ishinde osy máseleni qarap, týdyń naqty nusqasyn engizetinin habarlady. Nýrlanbek Shakıev zań jobasynyń bastamashylary negizgi kontseptsııadan uzamaı, týdyń jańarǵan nusqasy qabyldanatyn kezde avtorlar men qoǵam pikirin eskeredi dep sendirdi.
Qyrǵyz Respýblıkasynyń memlekettik sımvolyna ózgeris engizý týraly usynys tastaǵan – spıker Nýrlanbek Shakıev pen depýtat Ýlan Prımov. Olardyń sózinshe, qazir týdyń ortasyndaǵy kún sáýlesi men túndik túrlishe qabyldanady. Bireýler ony kúnbaǵysqa uqsatsa, endi biri kıiz úı bóligi retinde kóredi.
«Týdyń sýretine degen túrli kózqarasty boldyrmaý sharalaryn qabyldaý qajet. Osyǵan baılanysty qyrǵyz týyndaǵy tolqyn tárizdes sáýleni naqty kún sáýlesin beıneleıtin úlgige aýystyrý usynyldy», - delingen túsindirý anyqtamalyǵynda.
