Qyrǵyzstan prezıdenti sheneýnikterden halyqty úreılendirmeýdi talap etti
ASTANA. KAZINFORM — Qyrǵyzstan prezıdenti Sadyr Japarov memlekettik mekemelerde elektr energııasyn únemdeýdi sheneýnikterden talap etti. Ol jeke bıznes pen qarapaıym halyqqa qysym jasalmaýy kerektigin erekshe atap ótti. Bul týraly Kabar habarlady.
Prezıdent Sadyr Japarov eń aldymen memlekettik mekemelerde elektr energııasyn únemdeý sharalaryn bastaýdy tapsyrdy.
Prezıdent Ákimshiliginiń aqparattyq saıasat bóliminiń basshysy Daıyrbek Orýnbekovtiń habarlaýynsha, memleket basshysy mınıstrlikterdiń, vedomstvolardyń jáne aımaqtyq ákimshilikterdiń basshylaryna tapsyrmalardy jedel oryndaý úshin WhatsApp messendjeri arqyly tıisti úndeý joldaǵan.
Óz úndeýinde prezıdent energııa únemdeý tapsyrmasy jergilikti deńgeıde durys túsinilmegenin atap ótti.
— Elektr energııasyn únemdeý týraly tapsyrmany durys túsindińizder me, bilmeımin, biraq sizder ony qate oryndaı bastaǵan sııaqtysyzdar. Jeke tulǵalardyń jáne shaǵyn kásipkerlerdiń jaryǵyna tıisýdiń qajeti joq. Artyq dúrbeleń týǵyzyp, halyqty qorqytyp jiberdińizder, — dedi Sadyr Japarov.
Ol tapsyrmanyń negizgi máni — aıyldyktardan bastap «Yntymak-Ordo» ǵımaratyna deıingi memlekettik mekemelerde 18:00–den keıin elektr energııasyn tutynýdy azaıtý ekenin basa aıtty.
— Jumys kúni aıaqtalǵannan keıin qurylǵylar men jaryqty óshirý qıyndyq týǵyzbaıdy. Sonymen qatar keıbir mekemelerde qajetsiz bolsa da, dálizder men kabınetterde jaryq janyp turady. Elektr energııasyn únemdeýdi ózimizden bastaıyq, — dedi memleket basshysy.
Prezıdent oblystardaǵy úkimet ókilderine, ákimderge jáne aıyl okmotý jetekshilerine, ásirese mektepter men oqý oryndarynda tapsyrmanyń oryndalýyn kúsheıtýdi tapsyrdy.
— Eger qandaı da bir aýdanda memlekettik mekemelerde jaryq janyp tursa, onda ol jerdiń basshysy jumys istemeıdi dep esepteımiz. Mundaı tulǵalarǵa jaýapkershilik sharalary qabyldanady, — dedi Sadyr Japarov.
Sońynda ol elektr energııasyn únemdeý jeke tulǵalarǵa áser etpeýi tıis ekenin atap ótti.
— Jeke adamdarǵa eshqandaı shara qoldanbańyzdar. Qoryqpańyzdar, energııa jetkilikti. Tek Qyrǵyzstannyń ulttyq elektr jelisi mınıstrlikpen aqyldaspaı-aq shý kóterip jiberdi, — dedi prezıdent.
Aıta ketelik Bishkekte meıramhanalar, barlar men klýbtar keshki saǵat 22:00-den keıin jabylatyny týraly jazǵan edik.