Qyrǵyzstan bacshysy saılaýǵa qatyspaǵandarǵa aıyppul salýdy usyndy
ASTANA. KAZINFORM — IV Ulttyq quryltaı qorytyndysyn shyǵarý barysynda Sadyr Japarov Jogorký Kenesh depýtattaryna azamattardyń saılaýǵa mindetti túrde qatysýyn qarastyratyn zań jobasyn daıyndaýdy usyndy, dep habarlaıdy Kazinform agenttiginiń menshikti tilshisi.
Qyrǵyzstan basshysy jaqynda ǵana ótken saılaýda daýys berýshilerdiń nebári 37 paıyzy kelgen (ótken saılaýdaǵydan 200 myń adamǵa ǵana kóp) parlament saılaýyndaǵy saılaýshylar sanynyń azdyǵy týraly pikir bildirdi. Prezıdenttiń sózine qaraǵanda saılaýda qashyqtan daýys berý múmkindigi jasalǵan. Sondaı-aq daýys berý ýchaskeleri bazarlar men saýda ortalyqtarynda jáne shet memleketterde de uıymdastyrlǵan.
— Men kórsetkish 70 paıyzǵa jetedi dep úmittendim. Biz ózimiz óte beıqambyz, sóıtip otyryp, depýtattardy synaǵandy jaqsy kóremiz. Saılaý ýchaskesine kóbine daýsyn «satatyndar» keledi, al daýsyn satpaıtyndar saılaýǵa kelmeıdi jáne bul iske selqos qaraıdy, -dedi ol.
Prezıdent Jogorký Kenesh depýtattaryna eldiń árbir azamatyn daýys berýge mindetteıtin qujat daıyndaýdy tapsyrdy. Qujatqa Sıngapýr tájirıbesiniń negizinde saılaýǵa kelmegeni úshin aıyppul salý jáne endigi saılaýda daýys berý quqyǵynan aıyrý jazasyn engizýdi usyndy.
Eske sala keteıik, 25–26 jeltoqsan kúnderi Bishkekte memleket basshysynyń, Mınıstrler kabınetiniń músheleriniń, parlament depýtattarynyń, memlekettik organdar men jergilikti ózin-ózi basqarý ókilderiniń, sondaı-aq eldiń barlyq óńirlerinen kelgen 690 delegattyń qatysýymen IV Halyqtyq quryltaı ótti.
Quryltaı otyrysynda Prezıdent Qyrǵyzstannyń damýyna tikeleı áser etetin qoǵamdyq mańyzy zor máseleler men basym baǵyttardy kóterdi. Negizgi nazar muǵalim men dáriger mamandyqtarynyń bedelin arttyrýǵa, azamattardy áleýmettik qorǵaýǵa, bilim berý, densaýlyq saqtaý, mádenıet jáne sport salalary qyzmetkerleriniń jalaqysyn ósirýge, sondaı-aq áıelder men balalarǵa qatysty zorlyq-zombylyqty túbegeıli joıý máselesine aýdaryldy.
Sonymen qatar, sybaılas jemqorlyq pen uıymdasqan qylmysqa qarsy kúres, Ystyqkóldegi sý deńgeıiniń tómendeýi sekildi ózekti taqyryptar da keńinen talqylandy.
Prezıdent Sadyr Japarov memlekettiń syrtqy qaryzdy qashan óteýdi josparlap otyrǵanyn da málimdedi.