QHL: «Barys» qatarynan tórtinshi márte jeńildi

ASTANA. KAZINFORM - Qazaqstandyq «Barys» komandasy búgin, ıaǵnı 1 jeltoqsanda Qurlyqtyq hokkeı lıgasyndaǵy kezekti oıynyn Reseıde «Sıbır» (Novosibir) komandasyna qarsy ótkizdi.

Eki komanda da týrnır kestesinde tómengi orynnyń birinde kele jatqan edi. Elordalyq «Barys» 27 upaımen 19-orynǵa jaıǵassa, «Sıbır» 21 upaımen 22-orynda keledi.

Soǵan qaramastan búgingi kezdesý barysynda reseılik hokkeıshiler jınaqy qımyl kórsetti. Birinshi kezeńde olar qatarynan úsh shaıba soqsa, oǵan qazaqstandyq komanda ekinshi kezeńde bir golmen jaýap qaıyrdy. Úshinshi kezeńde «Sıbır» taǵy bir gol engizip, qorytyndy esepti belgiledi.

«Sıbır» (Novosibir, Reseı) - «Barys» (Astana, Qazaqstan) 4:1 (3:0, 0:1, 1:0)

1:0 - Kosolapov (Prıskı, Ýılson) - 14:40

2:0 - Nekolenko (Koshelev, Prıskı) - 15:21

3:0 - Abramov (Orlov, Ýılson) - 17:30

3:1 - Ýıllman (Ýolsh) - 39:40

4:1 - Chehovıch (Koshelev) - 58:14

Qaqpashylar: Krasotkın - Boıarkın

Osylaısha «Barys» qarsylasyna 1:4 esebimen ese jiberdi. Bul - komandanyń qatarynan tórtinshi jeńilisi.

Qazaqstandyq klýb budan keıin eki oıynyn elordada ótkizedi. Aldymen 5 jeltoqsanda Reseıdiń «Spartak» (Máskeý) klýbymen sheberlik baıqassa, odan keıin 7 jeltoqsanda «Sıbır» (Novosibir) komandasymen kezdesedi.