Keleste qyryqqabat pisti
TÚRKІSTAN. KAZINFORM - Elimizdiń ózge aımaqtarynda qys kúshine minip tursa, kelestik sharýalar qyryqqabattyń alǵashqy ónimin jınaýǵa kiristi.
Birtilek aýyldyq okrýgine qarasty Jolbasshy aýylynyń turǵyny Sheraly Tájibaev 2 gektar aýmaqqa qyryqqabat ekken bolatyn. Ótken jyly qara kúzde egilgen kókónis qazir pisip-jetilgen.
Búginde sharýa 38 tonna ónim jınady. Al, aqpan aıynda taǵy 100 tonna ónim alýdy josparlap otyr. Jınalǵan qyryqqabattardyń alǵashqy legi Astana, Almaty qalalaryna satylymǵa jiberilip jatyr.
– Bıyl qar az tústi. Qys sýyq bola qoıǵan joq. Jeńil jamylǵynyń astyna egilgen kókónis kósheti tez tamyr baılady. Jınalyp jatqan qyryqqabattyń árqaısysynyń salmaǵy 4 kelige deıin barady. Qyryqqabatty erterek eksek baǵaǵa da áser etedi. Qansha erte shyqsa, sonsha qymbat bolady, - deıdi Sheraly Tájibaev.
Jyl on eki aı boıy tynym tappaıtyn kelestik dıqandardyń deni qazir qyryqqabat egip jatyr. Óńirdegi sharýashylyqtar myń gektardan astam jerge qyryqqabat ósirmek. ıAǵnı, bir maýsymda egistikten úsh ret ónim jınaýdy josparlap otyr. Bul agrarlyq sala úshin de, sharýaǵa da tıimdi.
Aıta keteıik, ótken jyly Keles aýdany boıynsha 2 400 gektarǵa qyryqqabat ónimi egilip, sharýalar 35 myń tonna ónim alǵan bolatyn.
Eske sala keteıik, budan buryn qystyń qaqaǵan sýyǵynda Kentaýda qulpynaı piskenin jazǵan bolatynbyz.