Qazgıdromettiń eskertýine qulaq aspaǵan kim
ASTANA. KAZINFORM - Qazgıdromet mamandary byltyr jeltoqsan aıynda sý tasqynynyń joǵary qaýpi bar ekenin eskertken. Elimizde bolyp jatqan tabıǵı apatqa qaraǵanda eskertýge quzyrly organdar asa mán bermegeni me? Álde sý tasqyny qarqyndy bolatynyn eshkim kútpedi me?
Qazgıdromet sınoptıkteri 2023 jyldyń jeltoqsan aıynan bastap topyraq ylǵaly joǵary bolatynyn eskertip kelgen.
«Qazgıdromet» RMK gıdrologııalyq monıtorıng bóliminiń basshysy Baýyrjan Jekijanovtyń aıtýynsha, keı jerlerde ylǵaldylyq normadan alty ese asyp ketken.
«Brıfıngter men jıyndarda bul másele mınıstrlikter deńgeıinde kóterildi. Ylǵaldyń joǵary bolýyna baılanysty sý basý qaýpi joǵary bolatyny barlyǵyna eskertildi», - dedi ol.
Aıta keteıik, 2024 jylǵy 8 sáýirden bastap sý tasqyny qaýpiniń joǵary bolýyna baılanysty Qazaqstannyń ulttyq gıdrometeorologııa qyzmetiniń gıdrologııalyq jáne ilespe departamentteri táýlik boıy jumys rejımine aýystyryldy.
