Qazaqtar kóp demalatyn memleketter anyqtaldy
ASTANA. 16 tamyz. QazAqparat - Qazaqtar kóp demalatyn memleketter anyqtaldy.
Qazaqstan Týrıstik qaýymdastyǵy men Qonaqúıler men meımanhanalar qaýymdastyǵy dırektorynyń orynbasary Shakıra Ádilbekovanyń aıtýynsha, qazaqtar kóp baratyn elder qatarynda Azııa men Eýropanyń beldi memleketteri tursa, kerisinshe, sheteldikter Qazaqstannyń Almaty, Ońtústik Qazaqstan men Aqmola oblystarynyń demalý aımaqtaryna erekshe qumartady eken. Bul týraly «Aıqyn» gazeti búgingi sanynda jazyp otyr (avtory - Kámshat Tasbolat).
«Jalpy, bizdiń azamattarymyz shetelge kóp shyǵady. Árıne, eń aldymen, tańdaý Túrkııaǵa, onyń ishinde, ásirese, Antalııaǵa túsedi. Jyl saıyn bul elge barý deńgeıi 16-20 paıyzǵa artyp otyrady. Munyń sebebi de uǵynyqty: qol jetimdi baǵaǵa sapaly qyzmettiń kórsetilýi, vızasyz júıe, týroperatorlar men charter ustaýshylardyń kóptegen yńǵaıly usynystar jasaýy men ushý merziminiń qysqalyǵy. Qytaı, Birikken Arab Ámirlikterinde em-dom qabyldaıtyn, tanymdyq týrızmnen bólek, shop-týrızm men jaǵajaı týrızmi erekshe damyǵan. Bizdiń týrıster Italııa, Ispanııa, Frantsııanyń jaǵajaılaryn unatady, biraq bul elderge týrıster kóptep bara bermeıdi, sebebi shengen zonasyna vıza alý ońaıǵa soqpaıdy. Elshilikter syrtqa shyǵý qujattaryn rásimdeýde jeńildikter qarastyratyn kezderi árıne, suranys ta kúrt artyp ketedi, - deıdi Shakıra Ádilbekova.
Kúzgi-qysqy baǵyttar - teńiz jaǵalaýlaryndaǵy sýy jyly Taıland, Malaızııa bolyp otyr.Týrıstik kompanııalardyń biraz jyldan beri Haınan araldaryn usynyp otyrǵany taǵy belgili. Taý-shańǵy tebý usynysymen ushtasatyn týrızm túri Avstrııa, Shveıtsarııa, Bolgarııada damyǵan. Tórtinshi jyl qatarynan bizdiń naryqta Fınlıandııanyń Laplandııa óńiri, onyń ishinde «Levı» kýrorty belsendi túrde óz usynystarymen shyǵyp otyr.
Syrtqa shyǵatyn negizgi týrıstik baǵyttar kelesideı (adamdar sany):
|
|
Túrkııa |
Qytaı |
BAÁ |
Taıland |
Germanııa |
Qyrǵyzstan |
Úndistan |
|
2012 jyl |
222 905 |
40 586 |
37 341 |
18 498 |
11 746 |
5 911 |
5 009 |
|
2011 jyl |
203 663 |
53 331 |
34 844 |
18 359 |
11 062 |
3 262 |
4396 |
«Al Qazaqstanǵa syrttan keletin týrısterdiń deni iskerlik týrızmge jatady. Kongrestik týrızmge adamdar kóp kelgen saıyn, munda demalatyn týrıster sany da kúrt kóbeıedi. 2013 jyly iskerlik maqsatpen kelgen týrısterdiń eń kóp barǵan jerlerine Almaty, Astana, Atyraý, Ońtústik Qazaqstan men Qaraǵandynyń iskerlik jáne qarjy ortalyqtary jatsa, demalýǵa kóbine Almaty, Ońtústik Qazaqstan men Aqmola oblystaryna jıi baratyndary anyqtalǵan. Sheteldikter arasynda ekotýrızm erekshe suranysqa ıe. Olar tabıǵatyna áli de adam qoly tımegen jerlerde demalǵandy unatady. Mundaı jerlerge Saıram-Ógem jotalaryndaǵy ulttyq park, Aqsý-Jabaǵyly qoryǵynyń bıik shyńdary, Qarataý qoryǵynyń jaılaýdaǵy taý jotalary, ıÝNESKO-nyń álemdik tabıǵı murasyna kiretin Teńiz ben Qorǵaljyn kólderi, Kókshetaý, Altyn Emel, Saty, t.b. ný ormandary men kól-bulaqtaryna yqylas erekshe. Tıisinshe ınfraqurylym da damý ústinde. Bul salaǵa kásipkerler azdap aqsha quıa bastady. Demalý aımaqtaryndaǵy úı qojaıyndary bir-eki bólmesin týrısterge bóletin bolǵan. Baǵalar da asa qymbat emes: úsh rettik as beriletin mundaı qonaq bólmelerde turý kúnine 4 myń men 7 myń teńgege teń. Mundaı baǵa saıasaty sheteldikterdi qyzyqtyrady», - dep atap ótti ishki týrızmniń ahýalyna toqtalǵan maman.
