Qazaqstannyń EAEO elderimen saýda aınalymy 28,1%-ke ósti

ASTANA. QazAqparat - Aldyn ala málimetter boıynsha, Qazaqstannyń Eýrazııalyq ekonomıkalyq odaq elderimen ózara saýda aınalymy 2017 jyldyń qańtar-qazan aılarynda 13 971,4 mln dollarǵa jetti. Bul 2016 jyldyń osy kezeńimen salystyrǵanda 28,1%-ke artyq degen sóz, dep habarlaıdy «QazAqparat» HAA tilshisi QR Ulttyq ekonomıka mınıstrliginiń Statıstıka komıtetine silteme jasap.

Esepti kezeńde EAEO elderine shyǵarylǵan eksport kólemi aqshaǵa shaqqanda 4154,1 mln dollardy (2016 jyldyń osy kezeńine qaraǵanda 32,1%-ke kóp), ımport kólemi - 9817,3 mln dollardy (+26,5%) qurady. Qazaqstannyń EAEO elderimen syrtqy saýda aınalymyndaǵy Reseıdiń úlesi 92,2% bolsa, qalǵan bóligi Qyrǵyzstan (4,3%) men Belarýstiń úlesine (3,5%) týra keledi.