Qazaqstannyń 1 384 eldi mekeninde mektep joq

ASTANA. QazAqparat – Elimizde 1 384 eldi mekende mektep joq. Ondaǵy 34 644 oqýshy ózge eldi mekenderden qatynap bilim alyp júr. Oqý-aǵartý mınıstrliginiń QazAqparat saýalyna joldaǵan jaýabynda osyndaı derek berilgen.

«Otbasy jáne balalar salasynda memlekettik qyzmet kórsetý qaǵıdalarynda (2020 jylǵy 24 sáýirdegi № 158) jergilikti atqarýshy organdardyń bilim alýshylardy jaqyn mektepke deıin tegin tasymaldaý qyzmetin kórsetýge qoıylatyn talaptar aıqyndalǵan», - dep jazady mınıstrlik mamandary.

Vedomstvo málimeti boıynsha, 2022-2023 oqý jylynyń basynda 1 384 aýyldyq eldi mekende mektep joq bolǵan.

Bul aýyldarda mektep jasyndaǵy 34 644 bala turady.

Olarǵa memleket tarapynan tasymaldaý qyzmeti uıymdastyrylǵan.

Osylaısha 31 741 bala (91,6%) kúndelikti qatynap oqysa, 2 903 bala(8,4%) apta saıyn qatynap oqıdy.

Olardy tasymaldaýǵa 1 013 avtobýs bólingen.

«Balalar jyly aıasynda Oqý-aǵartý mınıstrligi jergilikti atqarýshy organdarmen birlesip 2022 jyly aýyl mektepteriniń avtobýs parkin (515 avtobýs) jańartý jobasyn iske qosty. Búgingi tańda óńirlerge 200-den astam avtobýs jetkizildi», - dep jazylǵan jaýapta.