Qazaqstannyń Konsýldyq jarǵysyna qandaı ózgertýler engizildi

ASTANA. KAZINFORM – Memleket basshysy Qasym-Jomart Toqaevtyń Jarlyǵymen Qazaqstan Respýblıkasynyń Konsýldyq jarǵysyna ózgertýler men tolyqtyrýlar engizildi.

Atalǵan Jarlyqpen bekitilgen Qazaqstan Respýblıkasynyń Konsýldyq jarǵysynda kirispe mynadaı redaktsııada jazylady: «Osy Qazaqstan Respýblıkasynyń Konsýldyq jarǵysy Qazaqstan Respýblıkasynyń konsýldyq qyzmetiniń quqyqtyq negizderin, Qazaqstan Respýblıkasynyń konsýldyq laýazymdy adamdarynyń Qazaqstan Respýblıkasynan tys jerlerde Qazaqstan Respýblıkasynyń, Qazaqstan Respýblıkasynyń azamattary men zańdy tulǵalarynyń quqyqtary men múddelerin qorǵaý jónindegi quqyqtary men mindetterin aıqyndaıdy».

Qazaqstan Respýblıkasynyń konsýldyq qyzmeti Qazaqstan Respýblıkasynyń Konstıtýtsııasyna, «Qazaqstan Respýblıkasynyń dıplomatııalyq qyzmeti týraly» Qazaqstan Respýblıkasynyń zańyna, osy Jarǵyǵa, bolý memleketiniń zańnamasyn eskere otyryp, ózge de normatıvtik quqyqtyq aktilerge, sondaı-aq Qazaqstan Respýblıkasynyń halyqaralyq sharttaryna, halyqaralyq quqyqtyń jalpyǵa birdeı tanylǵan qaǵıdattary men normalaryna sáıkes júzege asyrylady.

Qazaqstan Respýblıkasynyń dıplomatııalyq jáne oǵan teńestirilgen ókildikter joq memleketterde, bolý memleketiniń kelisimi boıynsha Qazaqstan Respýblıkasynyń Syrtqy ister mınıstrligi konsýldyq mekemeniń basshysyna dıplomatııalyq fýnktsııalardy júkteýi múmkin.

Konsýldyq mekemelerdiń ǵımarattarynda mindetti túrde Qazaqstan Respýblıkasynyń Memlekettik Týy kóteriledi jáne Qazaqstan Respýblıkasynyń Memlekettik Eltańbasy ornalastyrylady.

Konsýldyq mekemeniń Qazaqstan Respýblıkasynyń Memlekettik Eltańbasy beınelengen jáne konsýldyq mekemeniń ataýy Qazaqstan Respýblıkasynyń memlekettik tilinde jáne bolý memleketiniń resmı tilinde jazylǵan móri bolady.

Konsýldyq mekemeler óz quzyreti sheginde Qazaqstan Respýblıkasynyń memlekettik organdarymen jáne uıymdarymen ózara is-qımyldy mınıstrlikke habarlaı otyryp júzege asyrady.

Konsýldyq mekemeler Qazaqstan Respýblıkasynyń zańnamasynda belgilengen tártippen:

1) dıplomatııalyq poshtany jıyntyqtaýdy, resimdeýdi, qabyldaýdy jáne saqtaýdy júzege asyrady, mınıstrlikten kelip túsetin dıplomatııalyq poshtanyń basqa Qazaqstan Respýblıkasynyń shet elderdegi mekemelerge jetkizilýin uıymdastyrady;

2) mınıstrlikke jetkizý úshin dıplomatııalyq poshtany jıyntyqtaýdy, saqtaýdy, resimdeýdi júzege asyrady;

3) dıplomatııalyq poshtanyń mınıstrlikke jetkizilýin uıymdastyrady;

4) óz quzyreti sheginde dıplomatııalyq poshtany jetkizý kezinde onyń qaýipsizdigi men saqtalýyn qamtamasyz etý jóninde sharalar qabyldaıdy;

5) dıplomatııalyq poshtany jetkizýge qujattardy resimdeýdi jáne dıplomatııalyq kýrerler men «ad hok» dıplomatııalyq kýrerlerine berýdi qamtamasyz etedi.

Konsýldyq laýazymdy adamnyń áreketine (áreketsizdigine) qatysty shaǵymdar Qazaqstan Respýblıkasynyń Ákimshilik rásimdik-protsestik kodeksiniń talaptaryna sáıkes beriledi jáne qaralady.

Eger Qazaqstan Respýblıkasynyń azamaty bolý memleketinde fors-major jaǵdaılary saldarynan qıyn jaǵdaıǵa ushyraǵan jáne ómir súrýge qarajaty bolmaǵan, sondaı-aq qylmystyq qurylymdar áreketiniń jáne adam saýdasynyń qurbany bolǵan jáne osy týraly dıplomatııalyq ókildikke nemese konsýldyq mekemege habarlaǵan jaǵdaılarda konsýl:

1) osy azamatty shaqyrǵan adamnyń nemese uıymnyń onyń osy memlekette bolýyna baılanysty shyǵystaryn óteý mindettemeleriniń bar-joǵyn belgileıdi jáne olardyń oryndalýyna járdemdesedi;

2) osy azamattyń óziniń otbasy múshelerimen, týystarymen nemese ózge adamdarmen baılanys ornatýyna járdem kórsetedi;

3) Qazaqstan Respýblıkasynyń zańnamasyna sáıkes qarjylyq kómek kórsetedi;

4) ótinishtiń mazmuny boıynsha bolý memleketiniń memlekettik organdary men uıymdarymen ózara is-qımyldy júzege asyrady;

5) Qazaqstan Respýblıkasy azamatynyń qıyn jaǵdaıǵa tap bolý mán-jaılaryn tekseredi jáne Qazaqstan Respýblıkasynyń azamaty usynǵan materıaldardyń, obektilerdiń, qujattar men málimetterdiń shynaılyǵyn tekserý boıynsha sharalar qabyldaıdy;

Aıta ketelik SІM shetel elshilikteri men konsýldyqtaryn tirkeýdiń jańa tártibin jarııalaǵan edi.