Qazaqstannyń memlekettik qaryzy qansha

ASTANA. KAZINFORM – Jyl basynan beri Qazaqstannyń memlekettik boryshy 40 mlrd teńgege ulǵaıyp, 31,9 trln teńge boldy. Bul týraly Qarjy mınıstri Mádı Tákıev Úkimet otyrysynda aıtyp berdi.

− 1 shildedegi jaǵdaı boıynsha memlekettik borysh jyl basynan beri 40 mlrd teńgege ulǵaıyp, 31,9 trln teńgeni nemese jalpy ishki ónimge 21,1 % qurady. Negizgi ósý faktory – respýblıkalyq bıýdjet tapshylyǵyn qarjylandyrý jáne budan buryn tartylǵan qaryzdardy ıgerý boldy, − deıdi Qarjy mınıstri.

Budan basqa, mınıstrdiń aıtýynsha, bıylǵy 24 maýsymda Qarjy mınıstrligi 2,5 mlrd dollar somasyna evrobondtar (oblıgatsııalar) ornalastyrdy. Bul jıyntyq boryshty ulǵaıtpaı, syrtqy mindettemeler boıynsha aldaǵy tólemderdi tolyǵymen qaıta qarjylandyrýǵa múmkindik bermek.

− Osylaısha, syrtqy naryqta kvazımemlekettik sektor sýbektileriniń bolashaqta qaryz alýy úshin kiristilik baǵdary aıqyndaldy, − dedi Mádı Tákıev.

Aıta ketsek, búgin Úkimette bıylǵy qańtar-maýsym aılaryndaǵy áleýmettik-ekonomıkalyq damý jáne respýblıkalyq bıýdjettiń atqarylý qorytyndylary qaralyp jatyr.

Buǵan deıin Mádı Tákıev bıylǵy jartyjyldyqta memlekettik bıýdjettiń kiristeri shamamen 11 trln teńge nemese jospardyń 106,4% quraǵanyn aıtqan edi.

Sondaı-aq, qaıtarylǵan aktıvterdiń 318,1 mlrd teńgesi áleýmettik jobalarǵa bólindi.