Qazaqstandyqtar qandaı kólikterdi jıi satyp alady
Otandyq avtoóndiris boıynsha 2019 jyldyń úsh aıynyń kórsetkishi ótken jyldyń sáıkes kezeńine qaraǵanda artyq bolyp otyr. Atap aıtqanda, Qazaqstan avtobıznes qaýymdastyǵynyń málimetine sáıkes, 2019 jyldyń qańtar-naýryzynda Qazaqstanda barlyq tıptegi 8 822 tehnıka shyǵarylǵan. Olardyń 8 304-i jeńil avtokólik (+27,9%), 205 júk kóligi (+15,8%), 151 tirkeme men jartylaı tirkeme (+60,6%), 149 avtobýs (+577,3%) pen 13-i arnaıy tehnıka (-31,6%).
«Aldyn ala derekter boıynsha, Qostanaıdaǵy «Saryarqa AvtoProm» kompanııasy birinshi toqsanda 3 328 jeńil mashına, júk kóligin jáne avtobýs shyǵarǵan (+ 57,9%). Óskemendegi «Azııa Avto» kásiporny 5 499 jeńil avtokólik (+ 14,5%) qurastyryp otyr. Semeıdegi «SemAZ» 94 júk kóligin shyǵarsa, kókshetaýlyq «KAMAZ Injınırıng» 78 júk kóligin, «Daewoo Bus» markaly 61 avtobýsty, Almatydaǵy «Hyundai Trans Auto» kompanııasy 37 jeńil mashına jasady», - delingen habarlamada.
Qazaqstandyqtar jyl basynan beri Qazaqstanda óndirilgen 7,5 myń kólikti satyp alǵan. Ol jalpy avtonaryqtaǵy saýdanyń 55 paıyzdyq bóligi ekenin atap ótý kerek.
«Otandyq marka boıynsha ótimdiligi jaǵynan «Hyundai» birshama ósim kórsetýde. Jyl basynan beri atalmysh markadaǵy 2 322 kólik satylǵan. «Lada»-ny - 3 354, «Kia»-ny - 845, qostanaılyq «JAC»-ty 223 adam mingen. 2019 jyldyń birinshi toqsanynda jeńildetilgen nesıeleý baǵdarlamasy aıasynda qazaqstandyq óndiristegi jeńil avtokólikti satyp alý boıynsha 300 nesıe berildi», - delingen aqparatta.
