Qazaqstandyqtar Argentınaǵa vızasyz bara alady
ASTANA. QazAqparat - Búgin Astanada Qazaqstan men Argentına úkimetteri arasyndaǵy eki el azamattarynyń qysqa merzimdi vızasyz saparlary týraly kelisimge qol qoıyldy.
Bul qujatty QR Syrtqy ister mınıstri Erlan Ydyrysov pen Argentına Syrtqy ister mınıstri Ektor Tımerman bekitti.
«Búgin biz ekijaqty qatynastardyń mańyzdy máseleleri boıynsha pikir almastyq. Sondaı-aq ózekti jahandyq máselelerdi jan-jaqty talqylandy. Atap aıtqanda, biz eki el azamattarynyń vızasyz saparlary týraly mańyzdy kelisimge qol qoıdyq. Bul óz kezeginde elderimiz arasyndaǵy ózara qarym-qatynastardyń jańa múkindikterin ashady», - dedi E. Ydyrysov.
Osy oraıda mınıstr QR SІM osyndaı kelisimderdi bekitý budan ary qaraı da jalǵastyratynyn atap ótti.
Munymen qosa, E. Ydyrysov ótken jyly vızasyz saparlar týraly kelisimder Brazılııamen, Ekvadormen bekitilgenin jáne bul kelisimder jaqyn arada kúshine enetinin jetkizdi.
