Qazaqstandyqtardyń 95,6%-y ınternet qoldanady — statıstıka

ASTANA. KAZINFORM — Ulttyq statıstıka bıýrosy 21 000 úı sharýashylyǵy arasynda aqparattyq-kommýnıkatsııalyq tehnologııalardy paıdalaný aıasynda júrgizilgen zertteý nátıjelerin usyndy.

Іriktemeli zertteý nátıjeleri boıynsha 16-74 jas aralyǵyndaǵy halyqtyń 88,2% kompıýterdi, noýtbýkty nemese planshet sııaqty tehnologııalardy paıdalanady. Osy jas sanatyndaǵy ınternetti (mobıldi ınternetti qosa alǵanda) paıdalanýshylardyń úlesi 95,6% qurady.

— Halyqtyń tsıfrlyq saýattylyq deńgeıi (jeke kompıýterdi, smartfondy, planshetti, noýtbýkty, standartty baǵdarlamalardy paıdalaný, sondaı-aq ınternet arqyly qyzmetter men servısterdi alý daǵdylary bar paıdalanýshylardyń úlesi) 92,4% qurady (16-74 jas aralyǵynda), — delingen habarlamada.

Úı sharýashylyqtary arasynda uıaly telefon paıdalanýshylardyń úlesi 99,5%, kabeldik teledıdar — 21,2%, spýtnıktik teledıdar — 18,9%, ústel kompıýteri — 27,9%, noýtbýk — 59%, planshet — 32% qurady.

Internetti paıdalaný maqsattary boıynsha respondentterdiń basym bóligi «aqparat ornalastyrý nemese habar almasý» tarmaǵyn tańdaǵan — 79,5%, áleýmettik jeliler úshin — 69,5%, kontentti júkteý (fılmder, mýzyka jáne oıyndar) úshin — 43,1%.

Internet arqyly satyp alý (tapsyrys berý) jasaǵan paıdalanýshylardyń úlesi 32,1% qurar otyr. Eń kóp tapsyrys berilgen taýarlar: kıim men aıaq kıim (71,3%), azyq-túlik (45,2%), kosmetıka jáne turmystyq taýarlar (árqaısysy 33,2%).

Aıta keteıik, buǵan deıin Ulttyq statıstıka bıýrosy qazaqstandyqtardyń ortasha ómir súrý uzaqtyǵy artqanyn habarlaǵan edi.