Qazaqstandyqtar alǵashqy steıblkoındi qaıda paıdalana alady

ASTANA. KAZINFORM —Eýrazııalyq banktiń basqarma tóraǵasy Lázzat Satıeva teńgege baılanǵan steıblkoındi paıdalaný múmkindigi jaıynda túsindirdi.

Onyń sózine qaraǵanda, steıblkoındi paıdalanýdyń negizi maqsaty — halyqaralyq tólemder men aýdarymdar. 

— Bul qarjy operatsııalary óte jyldam jasalady. Ol úshin steıblkoın jobasy júzege asyryldy, ıaǵnı steıblkoın qyzmetterinde nan men sý sııaqty kúndelikti alatyn taýar úshin tóleýdiń qajeti joq. Bul úshin bizde kádimgi teńge bar jáne bul qarapaıym esepteý ádisi sanalady. Bul tsıfrlyq valıýta bolǵandyqtan, ony neǵurlym kúrdeli qyzmetterde — basqa elge halyqaralyq aýdarymdarda qoldanǵan durys. Máselen, qyzyma aqsha aýdarǵym kelse, óz ámııanymdy steıblkoınmen toltyryp, bırjaǵa tapsyrys bere alamyn. Osydan keıin bul qarajat Amerıkaǵa aýdarylady da, AQSh-ta júrgen balam dollar kúıinde alady, — dedi Lázzat Satıeva.

Budan buryn habarlanǵandaı, Qazaqstanda teńgege baılanǵan alǵashqy steıblkoın iske qosyldy. 

Sonymen qatar, QR Ulttyq banki tóraǵasynyń orynbasary Berik Sholpanqulov teńgege baılanǵan alǵashqy steıblkoındi qaıdan jáne qalaı alýǵa bolatynyn túsindirdi.