Qazaqstandaǵy ekinshi AES qaı oblysta salynýy múmkin

ASTANA. KAZINFORM – Energetıka mınıstri Almasadam Sátqalıev Úkimette ótken brıfıngte ekinshi atom elektr stantsııasyn salý josparlary týraly aıtyp berdi.

Onyń aıtýynsha, Qazaqstanǵa ıadrolyq klaster qurý úshin birneshe AES qajet, bul ıadrolyq salany damytý úshin barlyq múmkindikti paıdalanýdy, sonyń ishinde ýran ónimderin óndirý men ǵylymı áleýetti barynsha qoldanýdy kózdeıdi.

− Búginde bizge ekinshi stantsııanyń ornyn anyqtaý tapsyrmasy berildi. Oryndy tańdaý kezinde boljamdy energııa teńgerimin, júkteme ortalyqtaryna jaqyndyǵyn jáne ulttyq elektr jelisiniń damý deńgeıin eskeretin bolamyz. Bul jóninde sizderdi habardar etip otyramyz, - dep jaýap berdi A.Sátqalıev tilshi suraǵyna.

Ázirge, jobany júzege asyrý úshin yqtımal oryndardyń biri retinde Abaı oblysyndaǵy Kýrchatov aýmaǵy qarastyrylýda.

− Kýrchatov perspektıvalyq oryn retinde qarastyrylyp jatyr. Bul másele boıynsha tıisti sheshimdi komıssııa qabyldaıdy. Biz taldaý júrgizemiz, − dedi Energetıka mınıstri.

Aıta keteıik, búgin Prezıdent Qasym-Jomart Toqaev alǵashqy AES qurylysyn tezdetýdi jáne ekinshi ıadrolyq stansany qaı aımaqta salý qajettigi jóninde usynym berýdi tapsyrǵan edi.

Sondaı-aq, ekinshi AES salýǵa qaıtadan referendým ótkizilmeıdi.