Qazaqstandaǵy alǵashqy áýe taksıi: joba qandaı satyda
QONAEV. KAZINFORM — Qazaqstandaǵy alǵashqy áýe taksıi Almaty oblysynda synaqtan ótedi.
Bıyl aqpan aıynda Kólik mınıstri Almaty men Alataý qalasynyń arasynda sýtegimen júretin tikushaq-taksı paıda bolýy múmkin ekenin aıtty.
Kópshilikti qyzyqtyrǵan joba jarty jylda qanshalyqty alǵa jyljyǵanyn jáne qandaı satyda ekenin anyqtaý úshin vedomstvoǵa saýal joldadyq.
Kólik mınıstrliginiń jaýabyna sáıkes, Urban Air Mobility (UAM) jobasyn jeke ınvestıtsııa tartý arqyly jeke kompanııa júzege asyryp jatyr. Degenmen, mınıstrlikte UAM damytý máseleleri boıynsha jumys toby quryldy. Onyń quramyna: jeke uıymdar men memlekettik organdardyń ókilderi, sonyń ishinde Qorǵanys mınıstrligi, Tsıfrlyq damý, ınnovatsııalar jáne aeroǵarysh ónerkásibi mınıstrligi, sondaı-aq oblys ákimdiginiń ókilderi kirgen.
— UAM jobasynyń maqsaty — aımaqtyń týrıstik tartymdylyǵyn damytý jáne áýe qozǵalysynyń jańa tehnologııalaryn engizý arqyly kólik baılanysyn jaqsartý. Áýe tasymalyn Almaty qalasy men Alataý qalasy arasynda oryndaý josparlanǵan. Osy jyldyń sáýir aıynda qazaqstandyq kompanııa men sheteldik kompanııalar arasynda jumys kezdesýi ótti. Kezdesý qorytyndysy boıynsha UAM birlesken jobasyn iske asyrýdyń perspektıvalary talqylanyp, eń aldymen Alatau City aýmaǵynda ınnovatsııalyq áýe taksı júıesin engizý máselesi qarastyryldy, — dep habarlady mınıstrlikten.
Sonymen qatar vedomstvo jaýabynda jobanyń pılottyq synaqtary 2026–2027 jyldary Alataý qalasynyń aýmaǵynda ótkiziletini atap ótildi. Búgingi tańda qazaqstandyq kompanııa halyqaralyq sarapshylardy tarta otyryp, elimizdiń klımattyq jaǵdaıynda tehnıkalyq parametrlerin synaý jáne tirkeý úshin tik ushyp-qonatyn áýe kemeleriniń avıatsııalyq jáne tehnologııalyq múmkindikterin zertteý boıynsha ǵylymı-zertteý jumystaryn júrgizip jatyr.
— Bul zertteýler, sondaı-aq jobanyń tehnıkalyq-ekonomıkalyq negizdemesi 2025–2026 jyldary júzege asyrylatyn bolady. Odan bólek kompanııa Alataý qalasynyń aýmaǵynda synaq ushýlary úshin ýaqytsha alańdy jobalaýmen aınalysyp jatyr, — delingen jaýapta.
Al Almaty oblysynyń Jolaýshy kóligi jáne avtomobıl joldary basqarmasynyń málimetinshe, Alataý qalasy aýmaǵynda ornalasqan «Oiz Tulip» ındýstrııaldyq aımaǵynda áýe taksıi jobasyn iske asyrý maqsatynda ushý apparattaryn ushyrý úshin testilik ortalyq ashylǵan.
Sondaı-aq basqarma áýe taksıi ushatyn áýe dálizin aıqyndaý Qazaqstan Respýblıkasynyń «áýe keńistigin paıdalaný jáne avıatsııa qyzmeti týraly» Zańynyń 15-baby 6-tarmaǵyna sáıkes, Qorǵanys mınıstrliginiń quzyretinde ekenin habarlady.
Eske salaıyq, bıyl Iranda el tarıhyndaǵy alǵashqy áýe taksıi iske qosyldy.