Bıbısara Asaýbaeva álemdik elıtadaǵy úzdik jetilik qataryndaǵy ornyn saqtap qaldy
ASTANA. KAZINFORM — Qazaqstandyq shahmatshy Bıbısara Asaýbaeva 2026 jylǵy 1 mamyrdaǵy jaǵdaı boıynsha Halyqaralyq shahmat federatsııasy (FIDE) jańartqan áıelder reıtıngisinde otandasymyz 7-orynda tur. Onyń reıtıngi 2527 upaıdy qurady.
Bul kórsetkish qazaqstandyq shahmat tarıhyndaǵy mańyzdy jetistik sanalady. Bıbısara Asaýbaeva — álemdik reıtıngte mundaı joǵary orynǵa kóterilgen alǵashqy qazaqstandyq shahmatshy. Ol álemniń úzdik oıynshylary qatarynda ornyǵyp otyr.
Reıtıngtiń kósh basynda qytaılyq shahmatshylar keledi: Hoý Ifan (2596), Leı Tıntsze (2566) jáne Tszıýı Ventszıýn (2559).
Asaýbaevanyń qazirgi nátıjesi — halyqaralyq arenadaǵy turaqty ári senimdi oıyndarynyń jemisi. Ol joǵary deńgeıdegi qarsylastarmen teń dárejede oınap, úzdiksiz damý dınamıkasyn kórsetip keledi.
Bul jetistiktiń mańyzyn arttyratyn taǵy bir jaıt — shahmatshynyń jasy. Bıbısara álemdik elıtadaǵy eń jas oıynshylardyń biri sanalady, bul onyń aldaǵy ýaqytta odan da joǵary nátıjelerge jetý áleýeti zor ekenin ańǵartady.
Aıta keteıik, Bıbısara Asaýbaeva — blıts shahmattan úsh dúrkin álem chempıony, rapıdten álemniń vıtse-chempıony, úmitkerler týrnıriniń kúmis júldegeri, Azııa chempıony jáne Qazaqstandaǵy áıelder shahmatynyń kóshbasshysy.
Sonymen qatar ol «Barys» ordeni II jáne III dárejelerimen marapattalǵan. Bul marapat Qasym-Jomart Toqaev jarlyǵymen berilip, onyń shahmatty damytýǵa qosqan úlesiniń joǵary baǵalanǵanyn kórsetedi.
Eske sala keteıik, Bıbısara Asaýbaeva sáýir aıynda FIDE úmitkerler týrnırinde ekinshi oryn alǵannan keıin birden álemdik reıtıngte 7-orynǵa kóterilgen bolatyn.
Buǵan deıin Bıbısara Asaýbaeva Úmitkerler týrnırinen keıin álemdik reıtıngte joǵarylaǵanyn jazǵan edik.
