Qazaqstanda usaqtaý sharlaryn óndiretin zaýyt salynady
ASTANA. KAZINFORM – Kásiporyn 2028 jyly Taldyqorǵanda jumysyn bastaıdy dep josparlanýda. Onyń óndiristik qýattylyǵy jylyna 150 myń tonna ónim.
Astanada KAZ Minerals Toby men chılılik ME Elecmetal kompanııasy arasynda offteık-kelisimshartqa qol qoıyldy.
Jobaǵa tartylatyn ınvestıtsııa quny shamamen 85 mln AQSh dollary. Bastama kezeginde 100 jańa jumys ornyn ashyp, óńirdiń óndiristik áleýetin damytýǵa qomaqty úles qosady jáne memlekettik bıýdjetke túsetin túsimdi arttyrady dep kútilýde.
Taý-ken ónerkásibinde usaqtaýshy sharlardy shyǵarý isiniń mańyzy joǵary. KAZ Minerals Toby jyl saıyn atalǵan ónimniń 70 myń tonnasyn paıdalaný úshin shamamen 100 mln dollar jumsaıdy. Qazaqstanda mundaı sapadaǵy sharlardyń bolmaýy sebepti kompanııa usaqtaýshy sharlar óndirisiniń álemdik kóshbasshysy — ME Elecmetal ónimin tutynady.
«KAZ Minerals Management» JShS basqarma tóraǵasy Eldar Mamedov ME Elecmetal kompanııasymen áriptestik jańa múmkindikterge jol ashatynyna toqtaldy.
— KAZ Minerals Toby árqashan el basshylyǵynyń ındýstrııalyq saıasatyna sáıkes keletin óndiristik tsıkldiń barynsha tıimdiligine baǵyttalǵan úzdik sheshimderdi engizýge umtylady. Sapaly usaqtaý sharlaryn paıdalaný taý-ken baıytý keshenderiniń ónimdiligine áser etetin negizgi faktor. 2023 jyly biz ártúrli jetkizýshilerdiń ónim úlgilerin olardyń sıpattamalaryn buryn qoldanylǵan materıaldarmen salystyra otyryp, aýqymdy synaqtan ótkizdik. Baǵalaýdyń negizgi krıterııleri sharlardy tutyný, untaqtalǵan kenniń bir tonnasyna energııa tutyný, sharlardyń bólinýine baılanysty Óndiris aıaldamalaryn azaıtý, metall óndirýdi arttyrý boldy. ME Elecmetal ónimi barlyq kórsetkish boıynsha úzdik nátıje berdi, — dedi ol.
Onyń aıtýynsha, offteık-kelisimshartty bekitý — jaı ǵana iskerlik kelisim emes, eldiń taý-ken óndirisin damytý jáne onyń álemdik naryqtaǵy básekelestikke qabilettiligin arttyrýǵa baǵyttalǵan strategııalyq áriptestik bolyp sanalady. Zaýyt qurylysy sapaly ónimge suranysty qanaǵattandyrýdan bólek, jergilikti óndiristi damytýǵa, jańa jumys oryndaryn ashýǵa, jańa tehnologııalardy iske qosýǵa múmkindik beredi.
KAZ Minerals – Qazaqstandaǵy zamanaýı, iri aýqymdy, azshyǵyndy karerlik tıptegi taý-ken óndirisin damytýǵa baǵyttalǵan, ósý áleýeti zor mys óndirýshi kompanııa. Top operatsııalyq is-qyzmetin Abaı oblysynda ornalasqan Aqtoǵaı mys kenishinde, Orlov kenishi men fabrıkasynda jáne Pavlodar oblysyndaǵy Bozshakól kenishinde, ShQOd-aǵy eki kenish pen ken baıytý fabrıkasynda, Qyrǵyzstandaǵy Bozymshaq mys-altyn kenishinde júrgizedi.
