Qazaqstanda ulttyq ónerdi nasıhattaıtyn jańa joba túsirilip jatyr – ErlanQarın
ASTANA. KAZINFORM- Qazaqstanda ulttyq ónerdi dáriptep, nasıhattaýǵa arnalǵan jańa jobanyń túsirilimi bastaldy. Oǵan belgili kúıshiler, mýzykatanýshy ǵalymdar jáne ulttyq óner tarıhyn zertteıtin sarapshylar qatysady. Bul týraly QR Vıtse-prezıdenti Erlan Qarın óziniń Instagram paraqshasyna jazdy.
24 qazanda ótken Ideologııalyq keńes otyrysynda Prezıdent tapsyrmalarynyń oryndalý barysy jan-jaqty talqylandy. Sonymen qatar Erlan Qarın otandyq dızaınerlermen kezdesip, ulttyq aıdentıkany damytý jóninde pikir almasty.
-Jańa qoǵamdyq etıkany qalyptastyrý máselesine de erekshe nazar aýdaryldy. Memleket basshysy buǵan deıin osy baǵyt boıynsha naqty tapsyrmalar bergen bolatyn. Kezdesý barysynda qoıylǵan mindetterdi júzege asyrýǵa baǵyttalǵan Qazaqstandyq qoǵamdyq damý ınstıtýtynyń jańa jobalary tanystyryldy, — dep jazdy Erlan Qarın.
Budan bólek, Qazaqstannyń vıtse-prezıdenti ulttyq ónerdi dáriptep, nasıhattaýǵa arnalǵan jańa jobanyń túsirilim alańyna bardy.
-Jobaǵa belgili qazaqstandyq kúıshiler, mýzykatanýshy ǵalymdar, sondaı-aq ulttyq óner tarıhyn zertteıtin sarapshylar shaqyryldy. Túsirilim jumystary keshe bastaldy jáne taǵy birneshe kúnge sozylady. Bul joba týraly aldaǵy kúnderi tolyǵyraq aıtyp beremin, — dedi Erlan Qarın.
Buǵan deıin Kazinform Ideologııalyq keńestiń Erlan Qarınniń tóraǵalyǵymen ótken otyrysynda ishki saıasattyń negizgi mindetteri qaralǵanyn habarlaǵan bolatyn. Jıynda konstıtýtsııalyq qundylyqtardy ilgeriletýge jáne jańa qoǵamdyq etıkany qalyptastyrýǵa erekshe nazar aýdaryldy.
