Qazaqstanda tort baǵasy qansha turady
Tort — desert, shaı iship, kóńil jaılanǵanda taptyrmas tátti kondıterlik ónim. Qazaqstandyqtar tek týǵan kún keshterinde emes, túrli merekede dastarhanǵa tort qoıady. Kazinform agenttigi Jańa jyl qarsańynda tátti taǵamnyń qunyn saralap kórdi.
Qazaqstanda torttyń túri kóp. Biz bul joly bıskvıtten jasalǵanyn, ádemi árlengenin tańdap aldyq.
Elimiz boıynsha qarapaıym ǵana bıskvıtten jasalǵan torttyń eń arzany Astana qalasynda bolyp shyqty. Mundaǵy sýpermarkette shokolad pen jańǵaq qospasy bar bıskvıt baǵasy 2100 teńgeden bastalyp tur. Baǵasy 10500 teńgege deıin jetedi («Sútti tort», «Qyzyl barqyt»). Kondıterlerdiń óz qolynan shyqqan tort quny 7300-15500 teńge (baǵany salystyrý kezinde «Výpı paı» torty men jemis jáne karamel qospasy bar bıskvıt tańdaldy) dep kórsetilgen. Aıtyp óteıik, eger qalaýyńyz ózge bolsa, torttyń sánin keltirýge qosymsha 1000-2500 teńge tóleısiz.
Al Jańa jyl qarsańynda Taraz dúkenderindegi qarapaıym tort baǵasy 2300-4500 teńge bolyp tur. Kondıterlik dúkenderde torttyń kelisi 3600-4500 teńge. Avtorlyq tort kelisi 10 000-15 000 teńge dep baǵalanǵan.
Dál osyǵan uqsas baǵany Petropavldan keziktirdik. Sýpermarkette túrli krem jaǵylǵan bıskvıttiń kelisi 2300-5200 teńgeden satylyp jatyr. «Sútti tort», «Qyzyl barqyt» torty kondıterlik dúkenderde — 5 500-6000 teńge. Al «Napoleon» jáne banan men shokolady bar bıskvıt, «Výpı paı» baǵasy 7300 — 9000 teńge.
Oralda baǵa sál joǵary. Mundaǵy dúkenderde tort 2800 teńgeden satylyp jatyr. Al kondıterlik torttar (sábiz, qulpynaı, bal, shokolad jáne asjapyraq qosylǵan) baǵasy kelisine 6800-12000 teńge.
Aqtaý men Aqtóbede merekelik torttyń (túrli kremi bar jáne ádemi kómkerilgen bıskvıt) kelisi orta eseppen 2800-3500 teńge. Al kondıterlik dúkenderde baǵa joǵary. Máselen, Aqtaýda «Qyzyl barqyttyń» kelisi 6500 teńge, al ortasyndaǵy jaqpasynda jańǵaǵy bar bıskvıt nemese «Oreo» tortyn 7500 teńgege satyp alýǵa bolady. Aqtóbede bal qosylǵan tort nemese Napoleon baǵasy 3700-6500 teńge. «Sútti tort» nemese jemis-jıdek qosylǵan bıskvıt baǵasy 6800-7500 teńge.
Qostanaıda qant qosylyp qaınatylǵan qoıý sútten jasalǵan torttyń kelisi 3000 teńge, shokoladty tort 6400 teńge. Kondıterlik tort («Snıkers», shokoladty tort jáne jańǵaq-qulpynaı qospasy bar tort túrleri) baǵasy kelisine 7300-10800 teńge.
Taldyqorǵandyqtar jańajyldyq dastarhanǵa torttyń (bal qosylǵan torttan bastap «Tıramısýge» deıin) kelisin 3490-4890 teńgege satyp ala alady. Kondıterdiń óz qolynan shyqqan avtorlyq tort baǵasy quramy men sánine baılanysty ózgerip otyrady. «Sútti torttyń» kelisi 8000, al túrli jıdek pen jaqpasy bar tort kelisi shamamen 12000 teńge.
Shymkentte Jańa jyl merekesine oraı bezendirilgen tort (Máselen «Výpı paı» men «Sútti tort») kelisi 3750-5550 teńge. Al kondıterler quttyqtaý sózi jazylǵan, shyrsha beınelegen jáne zimbir qosylǵan un ónimimen kómkerilgen «Sútti tort», «Qyzyl barqyt» torttaryn 11000-15000 teńgege satyp jatyr.
Kókshetaýda túrli kremdi bıskvıt baǵasy 4000 teńgeden bastalady. Kondıterlik dúkenderde sábiz torty, «Aq barqyt» jáne «Karameldi tort» kondıterlik ónimi 6000-6500 teńge turady.
Qaraǵandy men Jezqazǵanda baǵa shamalas. Sýpermarketterde tort baǵasy — 4000-5500 teńge. Al úıde jasalǵan ónim men jeke kondıterlik tsehtardaǵy baǵa 7000-12000 teńge aralyǵynda. Ásirese «Sútti tort» pen «Výpı paı» suranysqa ıe. Baǵasy kelisine — 8000-9000 teńge.
Semeıde túrli kremi bar bıskvıt 4000 teńge turady. «Sútti tort» pen «Qyzyl barqyt» baǵasy — 7500 teńge. Al shokoladty kondıterlik ónim baǵasy 11000 teńgeden bastalady.
Qonaevtaǵy sýpermarkette «Napoleon» nemese bal qosylǵan torttyń kelisi 4500-5000 teńge. Al avtorlyq tortty 7000-9700 teńgeden (torttyń sánin keltirý úshin oǵan 1000-3000 teńge qosymsha aqsha tóleý kerek) satyp alýǵa bolady.
Atyraý dúkenderinde de bir keli tortty 4900-7900 teńgege satyp alýǵa bolady. Al jeke kondıter dúkenderinde baǵa kelisine 5500-9000 teńge aralyǵynda.
Pavlodarda «Sútti torttyń» kelisi 4980 teńge turady. Al kondıter dúkenderinde avtorlyq torttyń kelisi 7000 teńgeden bastalady.
Túrkistan dúkenderinde «Sútti torttyń» kelisi 5000 teńge turady. Al kondıterlik dúkenderde kremi bar tort kelisi 6000 teńgeden bastalady.
Óskemendegi dúkende kremi bar tort baǵasy 5000 teńgeden bastalady. «Napoleon», «Tıramısý» nemese «Qyzyl barqyt» torttary 5500-7000 teńge turady. Al kondıterler ázirlegen tort baǵasy 7000 teńgeden bastalady.
Qyzylordadaǵy dúkenderde tort baǵasy 5000 teńgeden bastalady. «Napoleon» torty 5000-7000 teńge, «Sútti tort» 5500-6500 teńge. Avtorlyq tátti tort 7000 teńge turady. Oǵan 500-1000 teńgege túrli áshekeılerdi qosýǵa bolady.
Al qymbat tort Almaty qalasynda bolyp shyqty. Sýpermarkette «Napoleon», bal qosylǵan tort kelisi 6400 teńgeden bastalady. Al «Snıkers» pen shokoladty tort kelisi — 8900 teńge. Tanymal kondıterler óz ónimine 9900-15000 teńge suraıdy. Munda da jeýge jaramdy túrli áshekeıler 1000-3000 turady.
Aıta keteıik, Kazinform buǵan deıin makaron, nan, shujyq, irimshik jáne ózge de taǵam túri qansha turatynyn anyqtap bildi.