Qazaqstanda sábı ólimi 19,3%-ǵa tómendedi
ASTANA. KAZINFORM — Búgin Densaýlyq saqtaý mınıstrliginiń alqa otyrysynda birinshi vıtse-mınıstr Tımýr Sultanǵazıev elimizdiń náresteler ólimin tómendetýdegi eleýli ilgerileýi týraly habarlady. Bul týraly vedomstvonyń baspasóz qyzmeti málim etti.
— Bıylǵy jyldyń 9 aıynda náreste óliminiń kórsetkishi ótken jyldyń sáıkes kezeńimen salystyrǵanda 19,3% — ǵa tómendedi. Bul 1000 tiri týǵandaǵy kórsetkishke shaqqanda 5,84 paıyz degen sóz. Al byltyr bul kórsetkish — 7,24% bolǵan, — delingen habarlamada.
Tımýr Sultanǵazıev mundaı nátıjeler alǵashqy medıtsınalyq kómekti damytý, ana men bala densaýlyǵyn saqtaý qyzmetterin nyǵaıtý, jańa týǵan nárestelerdi baqylaýdyń zamanaýı hattamalaryn engizý boıynsha júıeli jumystardyń arqasynda múmkin bolǵanyn atap ótti.
Sondaı-aq, birinshi vıtse-mınıstrdiń aıtýynsha, úsh óńirde: Atyraý, Abaı jáne Jetisý oblystarynda neonataldyq ólim kórsetkishterin jaqsartý úshin áleýet bar. Densaýlyq saqtaý mınıstrligi jergilikti atqarýshy organdarmen birlesip qoıylǵan maqsattarǵa qol jetkizý úshin sharalar qabyldanyp otyr.
Qol jetkizilgen jetistikterge qaramastan, Densaýlyq saqtaý mınıstrligi balalardyń ómir súrý sapasyn jaqsartý boıynsha jumysty jalǵastyrady.
Erekshe nazar aýdarylady:
- MSAK deńgeıinde pedıatrııalyq statsıonarlar men qyzmetterdi damytý;
- erte aralasý ortalyqtaryn qurý jáne keńeıtý;
- patronaj qyzmetin nyǵaıtý jáne ony tolyqtyrý;
- balalardaǵy aýrýlardyń aldyn alýdy jáne erte anyqtaýdy kúsheıtý.
— Ár balanyń densaýlyǵy — bizdiń basymdyǵymyz. Biz elimizdiń ár óńirinde zamanaýı jáne sapaly medıtsınalyq qyzmetter qoljetimdi bolatyndaı oń ózgeristerdi kórip, jumysty jalǵastyramyz, — dep atap ótti birinshi vıtse-mınıstr Tımýr Sultanǵazıev.
Densaýlyq saqtaý mınıstrligi Qazaqstannyń kishkentaı azamattarynyń densaýlyǵyn qorǵaýǵa baǵyttalǵan sharalardyń oń serpinin saqtap, nyǵaıtýǵa nıetti.
Dese de TMD elderiniń ishinde sábı óliminiń tirkelýi boıynsha Qazaqstan aldyńǵy qatardan túspeı keledi. Sábıdiń dúnıege kelý derekteri óskenimen, olardyń shetinep ketý kórinisteri kóbeıip kele jatqany alańdatady. Statıstıkaǵa shaqsaq, bala týý kórsetkishi eki paıyzǵa artsa, tıisinshe sábı ólimi bir paıyzǵa kóbeıgen. Bul derek eldiń demografııalyq ahýalyn kórsetse kerek.