Qazaqstanda Ortalyq Azııadaǵy alǵashqy Proton terapııa ortalyǵy salynady

NUR-SULTAN. QazAqparat – Densaýlyq saqtaý mınıstri Eljan Birtanov Ulttyq ǵylymı onkologııa ortalyǵy qaı jerde salynatynyn aıtyp berdi, dep habarlaıdy QazAqparat tilshisi.

«Ulttyq ǵylymı onkologııa ortalyǵy jobasynyń kesheýildep qalýyna baılanysty syn da aıtylǵan edi. Ol jobamen Nazarbaev Ýnıversıteti aınalysqan. Ótken jyldan bastap jobanyń parametrlerin qaıta qarap, qazirgi ýaqytta qaı jerde salatyndyǵyn aıqyndadyq. Basqa da ǵylymı ortalyqtarmen ıntegratsııa barynsha myǵym bolýy úshin biz turǵyzylatyn jańa oryndy belgiledik», - dedi Eljan Birtanov Parlament Senatynda Úkimettik saǵattan keıin tilshilerdiń suraǵyna jaýap bere otyryp.

Mınıstrdiń aıtýyna qaraǵanda, ortalyq – burynǵy Medıtsınalyq holdıngtiń aýmaǵynda salynady. ıAǵnı, ol – Ulttyq kardıohırýrgııa ortalyǵy, Ulttyq neırohırýrgııalyq ortalyq pen Ulttyq ǵylymı onkologııa jáne transpontologııa ortalyǵy turǵan medıtsınalyq keshen aýmaǵynda boı kóteredi.

«Ulttyq ǵylymı onkologııa jáne transpontologııa ortalyǵy Ulttyq ǵylymı onkologııalyq ortalyq bolyp transformatsııalanǵan edi. Sol ortalyqtyń aýmaǵynda qazirgi ýaqytta men aıtqan nysannyń qurylysy júrip jatyr. Sonymen birge, onyń janynda Nazarbaev Ýnıversıtetiniń Medıtsınalyq mektebi tur. ıAǵnı, bul onkoortalyqtyń salynýy – jetekshi tehnologııalarǵa qol jetkizýge múmkindik beredi», - dedi ol.

Eljan Birtanov nysan qurylysy boıynsha merdiger bekitilgenin, ol merdigerdiń – Ulttyq kardıohırýrgııa ortalyǵy men Ana men bala ortalyǵyn salǵan «Deloıd Injınırıng» kompanııasy ekenin atap ótti.

«Osy ortalyqtyń aıasynda Ortalyq Azııadaǵy birden-bir protondy terapııa ortalyǵy ashylady. Bul – shaǵyn isikterdi emdeıtin jańasha tehnologııa. Ortalyqtyń emdeý korpýsynyń qurylysyn 2020 jyldyń sońynda aıaqtaýdy kózdep otyrmyz. Protondy terapııa ortalyǵy kúrdeli bolǵandyqtan, onyń qurylysy shamamen 2021 jyldyń ortasynda aıaqtalady. Jobanyń jalpy quny – 70 mlrd teńge», - dedi ol.