Qazaqstanda múgedektigi bar azamattar kúni atalyp ótedi
ALMATY. KAZINFORM – Qazan aıynyń ekinshi jeksenbisinde elimizde múgedektigi bar azamattar kúni atap ótiledi. Bul týraly Eńbek jáne halyqty áleýmettik qorǵaý mınıstrligi habarlady.
Táýelsizdik alǵan 30 jyldan astam ýaqyt ishinde respýblıkada erekshe qajettilikteri bar adamdardyń quqyqtaryn qorǵaý jáne ómir súrý sapasyn arttyrý saıasaty júıeli túrde iske asyrylyp jatyr. Búginde Qazaqstanda erekshe qajettilikteri bar 732 myńnan astam adam turady. Olardyń kópshiligi – ózderiniń ómirlik mysaldarymen stereotıpterdi buzyp, eger árkim ózine senetin bolsa, múmkin emes eshnárse joq ekenin dáleldegen azamattar.
Múgedektigi bar adamdardyń arasynda daryndy sýretshiler, tabysty bıznesmender, qoǵam qaıratkerleri bar. Olar ınnovatsııalyq tehnologııalar jasap, shabyt syılaıtyn kitaptar jazyp, áleýmettik jobalar jasaýda. Sondaı-aq qoǵam damýyna baǵa jetpes úles qosyp keledi.
Bıyl Parıjdegi Paralımpıada oıyndarynda úzdik nátıje kórsetken múgedektigi bar sportshylarymyz elimizdiń erekshe maqtanyshtaryna aınaldy. Bizdiń respýblıka quramasy 9 medalǵa ıe boldy: 2 altyn, 3 kúmis jáne 4 qola.
Paralımpıadalyq oıyndardaǵy jetistik – memleketimizdiń múgedektigi bar azamattardyń quqyqtaryn qorǵaý, ómir súrý sapasyn jaqsartý jáne erekshe qajettilikteri bar adamdardy qoǵam ómirine qosý boıynsha dáıekti saıasattynyń nátıjesi.
Elimizdede múgedektigi bar azamattarǵa bilim berý, jumyspen qamtý, densaýlyq saqtaý, áleýmettik kómek, ońaltý qyzmetteri, saıası jáne qoǵamdyq ómirge qatysý jáne t. b. quqyqtaryn júzege asyrýǵa kepildik beretin zańnama bar. Barlyq óńirde qoljetimdi orta qurý, jumysqa ornalastyrý jáne jumyspen qamtýdy qamtamasyz etý, arnaýly áleýmettik qyzmetter kórsetý jáne erekshe qajettilikteri bar adamdardy tehnıkalyq kómekshi quraldarmen jáne arnaýly júrip-turý quraldarymen qamtamasyz etý jóninde sharalar qabyldanyp jatyr.
«Bıyl elimiz BUU-da Múgedektigi bar azamattardyń quqyqtary týraly konventsııany júzege asyrý maqsatynda qabyldanǵan sharalar týraly alǵashqy baıandamany qorǵady. BUU komıteti Qazaqstan qabyldap jatqan sharalardy joǵary baǵalady jáne 2030 jylǵa deıingi ınklıýzıvti saıasat tujyrymdamasynda iske asyrylatyn birqatar mańyzdy usynymdy usyndy. Biz búginge deıin kóptegen qyzmet atqardyq, biraq ary qaraı damý úshin odan da kóp jumys atqarýymyz qajet. Barlyǵy qoljetimdi jáne ınklıýzıvti qoǵam qurý úshin birge jumys isteıik», - dep atap ótti QR Eńbek jáne halyqty áleýmettik qorǵaý mınıstri Svetlana Jaqypova.
