Qazaqstanda kólikti qaıta tirkeý protsesi jeńildedi
ASTANA. KAZINFORM – Buǵan deıin kólik quraldaryn qaıta tirkeý úshin avtokólikti satyp alý-satýdyń notarıaldy kýálandyrylǵan sharty qajet bolatyn. Endi mamandandyrylǵan HQKO qyzmetkeri elektrondyq qujatty júıede qalyptastyra alady. Al satýshy men satyp alýshy eGov mobile qosymshasynyń kómegimen QR – kod skanerleý arqyly qujatqa qol qoıa alatyn bolady.
Aıta ketý kerek, bul qyzmet «Azamattarǵa arnalǵan úkimetke» tıesili.
«Bul jańashyldyq qyzmet alýshylardyń yńǵaılylyǵy men jaılylyǵy úshin jáne kólik quraldaryn tirkeý kezinde sybaılas jemqorlyqty joıý maqsatynda engizildi. Endi Memlekettik korporatsııanyń, QR ІІM jáne «UAT» AQ aqparattyq júıeleriniń yqpaldasýynyń nátıjesinde avtokólikti qaıta resimdeý protsesi ashyq bolady. Mámileni tirkeý kezinde jalǵan qol qoıý múmkin emes», - delingen memlekettik korporatsııa habarlamasynda.
Qyzmet alýshylar júgingen kezde mamandandyrylǵan halyqqa qyzmet kórsetý ortalyǵynyń operatory satýshy men satyp alýshy týraly, sondaı-aq kólik quraly jaıly málimetterdi júıege engizedi. Osydan keıin júıe avtomatty túrde mámileniń elektrondyq jazbasha nysanyn qalyptastyrady jáne ekranǵa QR kod shyǵarylady. Ony skanerlegennen keıin, avtokólikti satýshy jáne satyp alýshy taraptar qujatpen tanysyp, oǵan ETsQ kómegimen qol qoıa alady.
Sondaı-aq, uıymnyń múddelerin bildirýge senimhaty jáne ETsQ paıdalaný quqyǵy bar zańdy tulǵalardyń ókilderi úshin de bul protsesstiń analogy eGov business qosymshasy arqyly qoljetimdi.
Osy tusta, kólik quraldaryn qaıta rásimdeý kezinde mámileniń qaǵaz túrindegi jazbasha nysanyn qabyldaý osy jyldyń 23 sáýirinde QR ІІM kólik quraldaryn tirkeý jáne esepke alý qaǵıdalaryna ózgerister men tolyqtyrýlar engizilgendikten joıylǵanyn esterińizge sala keteıik.
