Qazaqstanda kimder zeınetke erte shyǵa alady
ASTANA. KAZINFORM — Elimizde keıbir sanattaǵy azamattardyń zeınetke jalpy belgilengen jastan erte shyǵý múmkindigi bar. Tolyǵyraq Eńbek jáne halyqty áleýmettik qorǵaý mınıstrligi halyqty áleýmettik qorǵaý salasyndaǵy retteý jáne baqylaý komıtetiniń zeınetaqy jáne áleýmettik qamsyzdandyrý basqarmasynyń basshysy Anel Sheneeva túsindirip berdi.
— Búginde Qazaqstanda er adamdar úshin jalpy belgilengen zeınetkerlik jas — 63, áıelder úshin — 61 jas. Sonymen qatar Áleýmettik kodekske sáıkes, 8 jasqa deıingi 5 jáne odan da kóp bala tárbıelegen áıelder 53 jasta zeınetke shyǵa alady. Memleket basshysynyń tapsyrmasyn oryndaý maqsatynda 2024 jylǵy 1 qańtardan bastap zııandy eńbek jaǵdaıynda jumys isteıtin qyzmetkerlerdiń áleýmettik qorǵaýyn arttyrý maqsatynda arnaıy áleýmettik tólemderdi taǵaıyndaý kózdelgen. Atalǵan tólemdi 55 jasqa tolyp, keminde 7 jyl mindetti kásiptik zeınetaqy jarnasyn tólegen azamattar alýǵa quqyly. Osylaısha, bul sanattaǵy jumysshylardyń zeınet jasyna jetkenge deıingi zııandy jaǵdaıy bar jumystan shyǵýǵa jáne arnaıy áleýmettik tólem alý quqyǵy bar, — dep túsindirdi Anel Sheneeva.
Sondaı-aq mınıstrlik ókili quqyq qorǵaý organdarynyń qyzmetkerleri de eńbek ótiline qaraı zeınetke erte shyǵa alatynyn aıtyp otyr.
— Eńbek ótili boıynsha zeınetaqy taǵaıyndaýdy qyzmetker jumys isteıtin bólimge baılanysty tıisti memlekettik organdar júrgizedi, — deıdi vedomstvo mamany.
Aıta ketsek, bıyl qazaqstandyqtarǵa 2 trln teńgeden astam zeınetaqy tólendi.
Sondaı-aq qazaqstandyqtar zeınetaqy qorynan 449,9 mlrd teńge jınaǵyn sheship aldy.