Qazaqstanda kimder tegin jeke kómekshi alýǵa quqyly
ASTANA. KAZINFORM – Elimizde múgedektigi bar adamdarǵa jeke kómekshi qyzmetin qarjylandyrý «Azamattarǵa arnalǵan úkimet» memlekettik korporatsııasy arqyly jergilikti atqarýshy organdardyń qarajaty esebinen júzege asyrylady.
QR Áleýmettik kodeksiniń 163-babyna sáıkes, jeke kómekshiniń qyzmetin alý quqyǵy júrip-turýy qıyn birinshi toptaǵy múgedektigi bar adamdarǵa ǵana beriledi. Bul qyzmet turǵylyqty jeri boıynsha medıtsınalyq-áleýmettik saraptama ázirlegen beıimsizdik jáne ońaltý jeke baǵdarlamasy aıasynda kórsetiledi.
Kómekti qalaı rásimdeý kerek
Jeke kómekshi qyzmetin alý úshin ótinim berýshi «Azamattarǵa arnalǵan úkimet» memlekettik korporatsııasyna nemese turǵylyqty jeri boıynsha Eńbekpen qamtý jáne áleýmettik qorǵaý basqarmasyna júginýi qajet.
Birinshi toptaǵy múgedektigi bar adamnyń ótinimin, jeke basyn kýálandyratyn qujatyn, sonymen qatar múgedektigin rastaıtyn qujattary men bolǵan jaǵdaıda beıimsizdik jáne ońaltý jeke baǵdarlamasyn usynýy qajet.
Ótinimdi múgedektigi bar adamnyń ózi, sondaı-aq onyń zańdy ókili nemese senim bildirgen tulǵasy bere alady. Eger qujattar durys ári ýaqyty rásimdelgen jaǵdaıda ótinim bes jumys kúni ishinde qarastyrylady.
Jeke kómekshi tańdaý úshin áleýmettik qyzmetter portalyn paıdalanýǵa bolady.
Kómek kórsetý merzimdiligi men sharttary
Jeke kómekshi birinshi toptaǵy múgedektigi bar adamdardyń júrip-turýyna jáne nysandarǵa barýyna kómektesedi. Qyzmet Qazaqstannyń azamattyq zańnamasyna sáıkes jasalǵan kelisimshart negizinde kórsetiledi.
QR Áleýmettik kodeksiniń 163-babyna sáıkes, jeke kómekshiniń qyzmetteri júrip-turýy qıyn, birinshi toptaǵy múgedektigi bar adamdarǵa ýákiletti memlekettik organ aıqyndaǵan tártippen kúnine segiz saǵattan aspaıtyn eseppen usynylady. Kómek kórsetý tártibi men sharttaryn árbir qyzmet alýshynyń qajettiligine qaraı ókiletti memlekettik organ retteıdi.
Jetkizýshi kelesi mán-jaı kezinde qyzmet kórsetýden bas tartýǵa quqyly:
- Uıym endi qyzmetterdi kórsetpeıdi – jetkizýshiler tiziliminen alyp tastaý týraly ótinim berilgen
- Júktemege baılanysty bos mamandar joq
- Alýshynyń turǵylyqty jerinde qyzmet kórsetilmeıdi
- Aldyndaǵy kómekshimen janjal – mamandy balaǵattaý nemese qorlaý (kýágerlermen dáleldengen)
- Fors-major jaǵdaıy (tótenshe oqıǵa, tabıǵı apat nemese áskerı is-qımyl ne ózge de jaıttar).
Buǵan deıin Tegin medıtsınalyq kómektiń kepildik berilgen kólemi (TMKKK) aıasynda el azamattaryna, qandastarǵa jáne turýǵa yqtııar haty bar sheteldikterge ota tegin jasalatynyn jazǵan edik.