Qazaqstanda qazy baǵasy qansha
Qazy — qazaq dastarhanyndaǵy eń negizgi jeńsik as. Baǵasy óńirge, ettiń maılylyǵyna jáne ony daıyndaý ádisine qaraı ózgerip otyrady. Kazinform agenttiginiń tilshisi qalalardaǵy baǵany salystyrdy.
Elimizdiń soltústiginde jáne ońtústiginde baǵa tómen. Petropavlda qazynyń kelisi 3 400 teńgeden bastalyp, 5 500 teńgege deıin jetedi. Al Pavlodarda kelisi 3 800 — 4 500, Túrkistanda 3 800 — 4 000 teńge aralyǵynda.
Qyzylordada kelisi 3 800 teńgeden, al Astana men Qonaevta 4 000 teńgeden bastalady.
Elimizdiń ortalyǵy men batysynda baǵa joǵary. Qaraǵandyda qazynyń kelisi 3 900–4 500 teńge, Jezqazǵanda — 4 000–4 500 teńge, al Aqtóbede — 4 500–5 500 teńge aralyǵynda.
Atyraý qalasynda baǵa 4 200 — 4 500 teńge aralyǵynda bolsa, Oral men Óskemende 4 500 — 4 900 teńgege satylyp jatyr.
Baǵa iri qalalar men soǵan jaqyn ornalasqan óńirlerde joǵary bolyp tur. Aqtaý qalasynda qazynyń kelisi 5 500 teńge, Semeıde 5 000 teńge.
Kókshetaýda qazynyń kelisi 6 700 teńge bolsa, Taldyqorǵanda 4 500 teńgeden bastalyp, 7 000 teńgege deıin jetedi.
Almatyda qazynyń kelisi 3 400 teńgeden bastalyp, keı et dúkeninde 8 500 teńgege deıin jetedi.
Et dúkenderi satýshylarynyń aıtýynsha, qazirgi kezde qaqtalǵan qazy da suranysqa ıe. Dámi erekshe ári uzaq ýaqyt saqtaýǵa bolady. Іri megapolıs pen týrıster kóp keletin óńirlerde jańa ǵana aınaldyrǵan qazyǵa qaraǵanda qaqtalǵan ónim ótimdi.
Qoryta aıtqanda Qazaqstanda qazynyń kelisi 3 400 teńgeden bastalyp, 8 500 teńgege deıin jetedi. Baǵa óńirge, qazynyń túrine jáne mereke kezindegi suranysqa baılanysty ózgerip otyrady.
Buǵan deıin Qazaqstanda jańajyldyq dastarhan jaıýǵa qansha qarjy jumsalatyny jáne sol merekeden keıin klınıng shaqyrý baǵasy qansha bolatyny týraly jazǵan edik.