Qazaqstanda qansha jetim bala bar

ASTANA. QazAqparat – Elimizde bala asyrap alý boıynsha oń dınamıka baıqalady. Tolyǵyraq Oqý-aǵartý mınıstrliginiń balalar quqyǵyn qorǵaý komıtetiniń bas sarapshysy Janna Sársenbaeva aıtyp berdi, dep habarlaıdy QazAqparat tilshisi.

«Balajan» jobasy oń nátıjesin berýde. Oǵan dálel qoldaý ortalyqtaryndaǵy balalardyń psıhologııalyq-emotsıonaldy jaǵdaıy men qarym-qatynasy jaqsaryp keledi. Bastysy balalarǵa yńǵaıly. Olar ózderin ınternatta emes, úıde júrgendeı sezinedi. Barlyq bala sekildi, sabaq oqıdy, mektepke barady. Atalǵan joba aıasyndaǵy taǵy bir baǵyt - kásibı patronattyq otbasyny damytý. ıAǵnı jetim jáne ata-ana qamqorlyǵynsyz qalǵan balalardy balalar úıine emes, birden patronattyq otbasyǵa berý múmkindigi. Búginde osy praktıka engizilip jatyr», – dedi Janna Sársenbaeva elordada ótken balalar úıin transformatsııalaý máselelerine arnalǵan jıyn barysynda BAQ ókilderiniń saýalyna jaýap bere otyryp.

Mınıstrlik ókiliniń málimdeýinshe, «Balajan» jobasy Aqmola oblysynda pılottyq rejımde júzege asyp jatyr. Alda respýblıkalyq deńgeıde aýqymy keńeıe túsedi.

«Kelesi jyly Aqkól qalasyndaǵy balalardy qoldaý ortalyǵynyń tájirıbesin respýblıkaǵa taratýdy josparlap otyrmyz. Qazir ol jaǵy zańnamalyq deńgeıde pysyqtalýda. Búginde elimizde 20 myńnan astam jetim bala bar. Olardyń 80%-ǵa jýyǵy týysy nemese basqa otbasylarda tárbıelenýde. Jalpy bala asyrap alý boıynsha elimizde oń dınamıka», - deıdi ol.

Buǵan deıin habarlaǵanymyzdaı, Qazaqstanda balalar úıleriniń ataýy men qyzmeti ózgerip jatyr.