Fın ǵalymdary jaralardyń jazylýyna áser etetin jańa tásildi anyqtady
ASTANA. KAZINFORM — Fın ǵalymdary qylqanjapyraqty aǵashtardyń shaıyry jaralardyń jazylýyna yqpal etetin jańa mehanızmdi anyqtady, dep jazdy AZERTADJ.
Shyǵys Fınlıandııa ýnıversıtetiniń ǵalymdary júrgizgen zertteý nátıjelerine sáıkes, shaıyr quramyndaǵy pınorezınol qabynýdy azaıtyp, teri jasýshalarynyń qalpyna kelýin yntalandyrady.
Zertteýshi Elıas Haapakorvanyń aıtýynsha, shaıyrdyń mıkrobtarǵa qarsy qasıeti burynnan belgili, alaıda jańa zertteý jaranyń jazylýyn tek mıkrobtarǵa qarsy áser arqyly ǵana emes, sonymen qatar qabynýdy azaıtý jáne teri regeneratsııasyn jyldamdatý sııaqty basqa da mehanızmder arqyly da júzege asatynyn kórsetken. Jumys barysynda shaıyr qosylystary negizinde maıly-sýly emýlsııa jasalyp, ol mıkrobqa qarsy áser etken.
Zertteý nátıjesinde bul emýlsııalar bakterııalarǵa, ashytqylarǵa jáne antıbıotıkke tózimdi shtamdarǵa, sonyń ishinde MRSA bakterııasyna qarsy tıimdi ekeni anyqtaldy. Sonymen qatar olar bıoqabyqshalardyń túzilýin tejep, qalyptasqan qabyqshalardy buza alady.
Ǵalymdar antıbıotıkke tózimdilik (antıbıotıkorezıstenttilik) keń taralýyna baılanysty ósimdikter negizindegi emdeý ádisterine qyzyǵýshylyq artyp kele jatqanyn atap ótti. Qylqanjapyraqty aǵash shaıyry Soltústik Eýropanyń halyq medıtsınasynda ǵasyrlar boıy qoldanylyp keledi.
Elıas Haapakorvanyń pikirinshe, alynǵan nátıjelerge qaramastan, bul taqyryp áli de jetkilikti zerttelmegen jáne qosymsha zertteýlerdi qajet etedi. Bul taqyryp 8 mamyrda Shyǵys Fınlıandııa ýnıversıtetide qorǵalady.
Aıta keteıik, ıtalııalyq ǵalymdar júrek qaterli isiginiń nege sırek kezdesetinin anyqtady.
