Qazaqstanda qansha munaı qory bar

ASTANA. KAZINFORM – Elimizde munaı qory qansha kólemde? Onyń taýsylýy múmkin be? Bul saýalǵa Ónerkásip jáne qurylys mınıstrligi Geologııa komıtetiniń tóraǵasy Erlan Aqbarov jaýap berdi.

«Qazir elimizde 4 mlrd 400 mln tonnaǵa teń munaı qory bar. Onyń ishinde óńdeýge jatatyn S1 munaı sanatynyń qory – 2 mlrd 900 mln tonna. Bul qazirgi jer qoınaýyn paıdalanýshylardyń qory. Odan bólek, barlaý júrgizilip jatqan munaı ken oryndary men ýchaskeler bar. Onyń kólemi áli eseptelmegen, ıaǵnı munaı taýsylyp qalady degen áńgime joq. Otandyq munaıdyń boljamdy qory 78 mlrd tonnany quraıdy», - dedi Erlan Aqbarov Ortalyq kommýnıkatsııalar qyzmeti alańynda ótken baspasóz máslıhatynda.

Geologııa komıteti tóraǵasynyń málimdeýinshe, 2022 jyly otandyq munaı salasynda «Eýrazııa» jobasy iske qosyldy.

«Joba aıasynda Kaspıı janyndaǵy shógindi basseıinniń tómengi qabaty zerttelip jatyr. Oǵan memleket aqsha bólip, aýqymdy jumys atqarylýda. Kaspıı teńiziniń qabatynda shógindi jynystar 25 shaqyrymǵa deıin jetedi. Ǵylymı turǵydan jasalǵan boljaý jumystary qordyń shamamen 1 trln tonnaǵa deıin jetetinin kórsetti», - deıdi ol.

Buǵan deıin elimizde zamanaýı geologııalyq qor qoımasy salynatyny týraly habarlaǵan edik.