Qazaqstanda ǵalymdarǵa akademııalyq demalys beriledi

Endi otandyq ǵalymdar ǵylymmen aınalysý úshin demalys ala alady, dep habarlaıdy Kazinform.

«Ǵylymmen aınalysý úshin demalys berý álemde bar tájirıbe. Kóp elderde ǵylym salasynda 10 jyldan astam jumys istegen, dárejesi bar ǵalymdar osyndaı múmkindik beriledi. Osy oraıda bizge áriptesterimizdi qoldaý mańyzdy. Ǵalymnyń sabaq bergeni jaqsy árıne, biraq oqýshylyq pen ǵylymdy birge alyp júrý óte qıyn. Ǵalymnyń jumys orny saqtalyp qalady, demalysty 1 jylǵa deıin alýǵa bolady», - dedi QR Parlamenti Májilisiniń depýtaty Ashat Aımaǵambetov BAQ ókilderiniń saýalyna jaýap bere turyp.

Halyq qalaýlysynyń aıtýynsha, ǵalymdar tek oqytýshylyqpen aınalyssa ǵylymnan alshaqtap qalady.

«Sebebi oqytýshynyń ǵylymmen aınalysýǵa ýaqyty joq, júktemesi joǵary. Sondyqtan ǵalymdarǵa akademııalyq demalys berýdi engizýdi usynyp otyrmyz. Bul múmkindik barlyq ǵalymǵa birdeı berilmeıdi. Sondaı-aq, demalystaǵy ǵalymǵa belgili bir kólemde aqy tóleý jaǵyn da qarastyryp otyrmyz», - deıdi ol.

Aıta keteıik, búgin Ádilet mınıstrliginde birneshe zań jobasy boıynsha Úkimet qorytyndysy qaraldy. Atalǵan sharaǵa Ádilet mınıstri Azamat Esqaraev jáne Májilis depýtattary qatysty.