Qazaqstanda eki JOO-nyń aktsııalary satyldy

ASTANA. QazAqparat - Almaty qalasynda ornalasqan eki joǵary oqý ornynyń 35 paıyz aktsııalary satyldy, dep habarlaıdy QazAqparat tilshisi Elektrondyq saýda alańynyń resmı saıtyna silteme jasap.

Elektrondyq saýda alańyndaǵy málimetke sáıkes, Abylaı han atyndaǵy Qazaq halyqaralyq qatynastar jáne álem tilderi ýnıversıteti aktsııalarynyń 35 paıyzynyń alǵashqy baǵasy 1 mlrd 711 mln 278 myń 931 teńge bolǵan. Saýda-sattyqqa ótinish bergen eki adam qatysqan. Aqyry, ýnıversıtettiń atalmysh aktsııasy 1 mlrd 728 mln 434 myń 502 teńgege satyldy.

Aıta keteıik, QR Qarjy mınıstrligi Memlekettik múlik jáne jekeshelendirý komıtetine atalǵan ýnıversıtet aktsııalarynyń 35 paıyzy, ıaǵnı 43 931 danasy (barlyǵy 125 517) tıesili bolǵan.

Sonymen birge, Qazaq bas sáýlet-qurylys akademııasy aktsııasyn satyp alýǵa 4 ótinish kelip túsken. Aqyry aktsııalardyń 35 paıyzy 2 mlrd 547 mln 345 myń 363 teńgege satyldy.