Qazaqstanda dári-dármek óndirisi tómendep barady
ASTANA. KAZINFORM — 2023 jyldyń qorytyndysynda farmatsevtıka sektoryndaǵy otandyq óndiris kólemi tómendegen. Bul týraly Úkimet otyrysynda Premer-Mınıstr Oljas Bektenov aıtty.
«Erekshe nazar aýdaratyn mańyzdy salanyń biri — farmatsevtıka. Ótken jyldyń qorytyndysy boıynsha osy sektordaǵy otandyq óndiristiń úlesi 20-dan 14 paıyzǵa deıin tómendep ketti. Dárilik zattarǵa ishki suranys jyl saıyn ulǵaıyp otyr. Al, bizde óndiristiń bul salasy kerisinshe tómendep barady. Memleket basshysy otandyq dárilik zattar men medıtsınalyq buıymdardyń úlesin 2025-shi jylǵa qaraı 50 paıyzǵa deıin jetkizý mindetin qoıdy. Ol úshin birqatar ınvestıtsııalyq jáne salyq preferentsııalary kózdelgen, qajetti memlekettik qoldaý quraldary bar», — dedi Premer-Mınıstr.
Úkimet basshysynyń aıtýynsha, farmatsevtıka ónimderine 10 jylǵa memlekettik tapsyrysqa kepildik berý tetigi arqyly otandyq kásiporyndar jańa óndiristerdi iske qosýǵa nemese qoldanystaǵy óndiristerdi jańartýǵa múmkindik alady.
«Densaýlyq saqtaý mınıstrligi tehnologııalar transferti jáne jańa óndiristerdi lokalızatsııalaý úshin jahandyq farmatsevtıkalyq korporatsııalarmen baılanystardy kúsheıtýi kerek. Sonymen qatar bıylǵy 1-shi shildeden bastap dárilik zattardy tańbalaýdy jáne olardyń tirkeý kýálikterin Eýrazııalyq ekonomıkalyq odaq talaptaryna sáıkes keltirýi qajet. Naryqqa qatysýshylar tarapynan da buǵan qatysty kóptegen suraqtar týyndap otyr. Densaýlyq saqtaý mınıstrligi osy máseleniń baıybyn jan-jaqty, durys túsindirip, reformalardyń ýaqtyly iske asyrylýyn qamtamasyz etýi qajet», — dedi Oljas Bektenov.
