Qazaqstanda bir gramm altyn qansha turady

ASTANA. KAZINFORM – Qazaqstanda altyn baǵasy tómendep jatyr.

Qazaqstan Ulttyq bankiniń 2026 jylǵy 26 naýryzdaǵy derekterine sáıkes, bir gramm altynnyń baǵasy 70 647,24 teńgeni qurady. Bul – bir apta burynǵy kórsetkishten 6 655 teńgege tómen. Ótken aptada altynnyń bir grammy 77 302,24 teńge bolǵan.

Jalpy, jyl basynan beri altyn baǵasy qubylyp keledi. Qańtar aıynyń sońynda onyń eń joǵary deńgeıi tirkelip, bir gramm 89 002,60 teńgege deıin jetken edi. Qazirgi baǵa sol kezeńmen salystyrǵanda edáýir tómendegen.

Baǵanyń tómendeýi álemdik naryqta da baıqalyp otyr. Buǵan deıin Taıaý Shyǵystaǵy jaǵdaı aıasynda altyn men kúmistiń arzandaǵany habarlanǵan bolatyn.

Ádette mundaı geosaıası shıelenis altynǵa suranysty arttyrady. Alaıda bul joly jaǵdaı basqasha órbidi. Munaı baǵasyna qatysty belgisizdik pen paıyzdyq mólsherlemelerdiń ózgerýi ınvestorlardyń sheshimine áser etti. Sonyń saldarynan kúmis baǵasy shamamen 40%-ǵa tómendedi. Al altyn arzandaý úrdisine ótti.

Osy jaǵdaıdyń áserinen, 23 naýryzdaǵy tańǵy saýda barysynda altynnyń spot baǵasy bıylǵy eń tómen deńgeıine deıin túsip, bir ýntsııasy shamamen 4 100 dollardy qurady.

Aıta keteıik, 29 qańtarda altynnyń bir ýntsııasy 5 594,82 dollarǵa jetip, eń joǵary deńgeıge kóterilgen edi. Sodan beri onyń baǵasy 20%-dan astamǵa tómendedi.