Qazaqstanda bıyl qansha shaqyrym jáne qandaı joldar salynady

ASTANA. KAZINFORM – QR Kólik mınıstrligi bıyl elimizdiń aýmaǵynda salynatyn joldardy atady.

- Memleket basshysynyń Ulttyq quryltaıda bergen tapsyrmasyna sáıkes, 2024 jyly 12 myń shaqyrym tasjoldy jóndeý jáne qaıta jańartý jumystarymen qamtý josparlanǵan. Búgingi kúni 7,2 myń shaqyrymǵa jýyq joldardaǵy jumystar aıaqtaldy. Onyń ishinde qurylys jáne qaıta jańartý boıynsha 3,1 myń shaqyrym (2,2 myń shaqyrymy aıaqtaldy), respýblıkalyq jelini kúrdeli jáne ortasha jóndeý boıynsha 4,9 myń shaqyrym (1,5 myń shaqyrymy aıaqtaldy), jergilikti jelini jóndeý boıynsha 4,3 myń shaqyrym (3,6 myń shaqyrymy aıaqtaldy) qamtyldy, - delingen mınıstrliktiń Kazinform agenttigine bergen jaýabynda.

Qazirgi kezde avtojoldardyń jalpy uzyndyǵy 95 myń shaqyrymdy quraıdy, onyń 25 myń shaqyrymy respýblıkalyq jelige qarasty bolsa, qalǵan 70 myń shaqyrymy jergilikti jelige jatady. Jergilikti jelini damytý boıynsha 2029 jylǵa deıin keminde 14 myń shaqyrym jergilikti joldardy qaıta jańartý jáne jóndeý jumystary atqarylady.

- 2025-2030 jyldar aralyǵynda jalpy uzyndyǵy 4,7 myń shaqyrymdy quraıtyn (3,7 myń shaqyrym – I sanat, 1 myń shaqyrym – II sanat) jańa jobalardy kezeń-kezeńimen iske asyrýdy bastaý josparlanǵan, - dep atalyp ótken vedomstvo aqparatynda.

Atap aıtqanda, 2025 jyly «Qyzylorda – Jezqazǵan» (208 shq), «Aqtóbe – Ulǵaısyn» (234 shq), «Qaraǵandy – Jezqazǵan» (572 shq), «Saryaǵash qalasyn aınalyp ótý» (102 shq), «Qyzylorda qalasyn aınalyp ótý» (20 shq), «Qyzylorda – Sekseýil» (470 shq), «Atyraý – Dossor» (86 shq), «Rýdnyı qalasyn aınalyp ótý» (16,9 shq), «Jańaózen – Kendirli» (156 shq), «Petropavl qalasyn aınalyp ótý» (8 shq), «Túrkistan qalasyn aınalyp ótý» (29,6 shq), «Astana – Qostanaı – RF shekarasy» (830 shq), «Shymkent qalasyn aınalyp ótý» (48 shq), «Atyraý – Oral» (ortasha jóndeý) (516 shq), «Atyraý – Chapaı» (136 shq), «Almaty – Talǵar – Báıdibek Bı» (68 shq), «Almaty – Úshqońyr» (48 shq), «Beıneý – Sekseýil» (736 shq), «Oral kópiri» (6,5 shq) syndy jobalardy iske asyrýdy bastaý qarastyrylǵan.

Bul turǵyda perspektıvaly jobalardy júzege asyrý úshin qazir ınvestıtsııa tartý máseleleri pysyqtalyp jatyr.

Eske salsaq, jaqynda Úkimet basshysy Oljas Bektenov Batys Qazaqstan oblysynda jol salasynda atqarylǵan jumysty synǵa aldy.