Qazaqstanda balalarǵa arnalǵan SIM-kartalar engiziledi
ASTANA. KAZINFORM – Oqý-aǵartý mınıstri Juldyz Súleımenova Úkimet otyrysynan keıin ótken baspasóz máslıhatynda balalardy áleýmettik jelige shektep kirgizý saıasaty qalaı júrgiziletinin túsindirdi.
- Shekteý máselesine kelsek, qazir birneshe usynysty qarastyryp jatyrmyz, jumys toby quryldy. Balalardy zańǵa qaıshy kontentten qorǵaý úshin kóptegen elde qoldanylatyn tásilder bar. Bul másele ashyq, ol qoǵammen, ata-analarmen, pedagogıkalyq qaýymdastyqtarmen jáne BAQ-pen birge talqylanady, - dedi ol.
Vedomstvo basshysy shekteý sharasy úsh tásil negizinde iske asatynyn aıtty.
- Aldymen balalarǵa arnalǵan SIM-kartalardy tirkeýdi engizgimiz keledi. Bul birinshi tásil. Ekinshi tásil – 14 jasqa deıingi balalar zańǵa qaıshy kontentti kóre almaıtyndaı tetik engizý. Úshinshiden, qazir mektepte tsıfrlandyrý jáne medıa saýattylyq pánderi bar. Osy pánder aıasynda biz balalardyń tsıfrlyq keńistikte saýatty bolýyna kúsh salamyz, - dedi Juldyz Súleımenova.
Buǵan deıin Áleýmettik jelige kirýshilerdi jasyna qaraı shekteıtin zań jobasy talqylaýǵa shyǵarylatynyn jazǵan edik.
