Qazaqstanda bal baǵasy qansha turady
Kúz kelgende sýyq tıip aýyratyndar kóbeıdi. Mundaıda adamdar keıde bal tutynady. Tabıǵı ónimniń Qazaqstan qalalaryndaǵy quny qansha turady? Kazinform agenttigi saralap kórdi.
Qazaqstanda Altaı ólkesiniń baly suranysqa ıe. Elimizdiń shyǵysy bal óndirisiniń otany desek te bolady. Munda Qazaqstanda óndiriletin baldyń 70% shyǵarylady. Osy aımaqta bal baǵasy kelisine 2,5 myń teńgeden bastalady. Qazir biz eń kóp taraǵan gúl baly týraly saralap otyrmyz.
Semeıde de dál osy baǵa saqtalady. Sebebi Semeı men Óskemen arasy nebári 200 shaqyrym. Sonymen birge Pavlodarda da bir keli bal baǵasy 2,5 myń teńge turady.
Soltústikke qaraı bet alsaq, baǵa kóterile beredi. Elimizdiń astanasynda baǵa orta eseppen 3 myń teńgeden bastalady. Al Qostanaı men Petropavlda bal baǵasy shamamen 3200-3500 teńge bolyp tur.
Ońtústikke qaraı jaǵdaı ózgeredi. Bul suranysqa baılanysty bolýy múmkin. Máselen Almatyda bal baǵasy kelisine 3500-4000 teńge bolyp tur. Al Shymkent pen Túrkistanda baldyń keıbir surpyn, onyń ishinde maqsary balyn 2500 teńgege satyp alýǵa bolady. Al ózge baldyń ortasha quny 3000-3500 teńge.
Bal quny elimizdiń batysynda joǵary. Qalalar arasyn salystyrǵanda, aıyrmashylyq anyq baıqalady. Atyraýda orta eseppen kelisi 3500 teńge dep belgilengen. Al Aqtaýda kelisi 7500-9000 teńge. Bul eń joǵary baǵa.
Aıta keteıik, jóke, qaraqumyq sekildi baldyń ózge túrlerine baǵa taǵy myń teńgege ósedi. Shymkentte baǵa kelisine 6 myń teńge bolyp tur.
Eske salsaq, Kazinform agenttigi buǵan deıin makaron ónimderin, nan, shujyq pen irimshik baǵasyn bildi.
